Germaniya Bundesligasida ishlari aslo yurishmayotgan «Shtutgart» mamlakat kubogi yarim finaliga yo‘l oldi.

Bunaqasi futbolda kam bo‘lsada, uchrab turadigan holat, albatta. Ammo masalaning yana bir tomoni bor - «Shtutgart» yarim final dovonini qanday zabt etgani kishini hayratlantiradi.

Bundesliga turnir jadvalining oxirgi 18-pog‘onasidan chiqolmayotgan «Shtutgart» 5 aprel kuni mamlakat kubogi chorak finalida quyi divizion vakili - «Nyurnberg» mehmoni bo‘lib, 83-daqiqada urilgan yagona gol evaziga ortga g‘alaba bilan qaytdi. Bundesliga autsayderi shu tariqa yarim finalchilar qatoriga qo‘shildi. Shtutgartliklar Germaniya kubogi 1|2 finaligacha bo‘lgan yo‘lda 4ta bosqichdan o‘tishdi.

Endi eng asosiy fakt: jamoa mamlakat kubogining har bir bosqichi o‘yiniga yangi bosh murabbiy boshqaruvida kirishdi:

1/32 final - Pelligrino Matarasso bilan

1/16 final - Mixael Vimmer bilan

1/8 final - Bruno Labbadiya bilan

1/4 final - Sebastyan Xyoness bilan

«Shtutgart»ning mamlakat kubok sari yo‘lini oddiy va qisqacha ifoda etsak, «4» raqami asosiy o‘ringa chiqadi: 4ta bosqich, 4 nafar murabbiy, 4ta g‘alaba. Ha, juda noodatiy yo‘l.

«Shtutgart»ni endi oldinda yarim final dovoni kutmoqda. Qiziq, yaqindagina ish boshlagan amaldagi bosh murabbiy Sebastyan Xyoness bu dovonga yetib borarmikan? Bundesligadagi umumiy vaziyatga qarasak, bir narsa deyish qiyin. Ehtimol, «Shtutgart» kuyok turniriga doir asosiy raqamni «4»dan «5»ga aylantirar hali - 5ta bosqichi, 5 nafar murabbiy, 5ta g‘alaba va final...