2014 yildan buyon «MYU» safida to‘p surib kelayotgan zamonaviy futboldagi eng kuchli chap qanot himoyachilaridan biri Lyuk Shou yaqinda amaldagi shartnomasi muddatini yana bir bora uzaytirdi.
Xorvatiyalik tolmas jangchi yangi kelishuvga asosan, 2027 yilning yoziga qadar «Old Trafford»da qoladi. Lyuk hamkorlik bitimi ostiga rasman imzo chekkanidan so‘ng klub matbuot xizmati uni darhol suhbatga tortdi. Futbolchi shu tariqa «qizil iblis»ga aylangani sababiga to‘xtaldi, kelgusi mavsumlar uchun ambisiyalari haqida gapirdi: «Erik ten Xag boshqaruvidagi ilk mavsumda «MYU»ning rivojlanish yo‘lini ko‘rgach, yangi bitim tuzishga qaror qildim. O‘ylaymanki, bugungi «MYU»ni oldinda ravon yo‘l va katta zafarlar kutmoqda».
- Lyuk, avvalo, yangi shartnoma bilan tabriklaymiz. Bundan nechog‘li xursandsiz va kelajakda sizni va hozirgi jamoani nimalar kutmoqda?
- Tabrik uchun rahmat. «Old Trafford»da yana bir bora shartnoma tuzish imkoniyatiga ega bo‘lganimdan juda xursandman va klubdan bag‘oyat minnatdorman. Hozir «MYU» libosida 9-mavsumni o‘tkazyapman, tabiiyki, bu kichik davr emas, ayniqsa, klub darajasini hisobga olganda. Tajribamdan kelib chiqib aytsam, klub hozirda to‘g‘ri yo‘nalish bo‘yicha oldinga harakatlanmoqda va ishonchim komil, hali hamma barchasiga guvoh bo‘ladi. Qisqasi, bu yerda qolish uchun katta ambisiyalarga egaman. Binobarin, yangi bosh murabbiyimiz shunchaki, ajoyib g‘oyalarga ega. O‘ylaymanki, biz u bilan ko‘plab sovrinlarni qo‘lga kiritamiz, katta marralarni zabt etamiz.
- Ayni payt xuddi jamoa kabi ajoyib holatdasiz. Hozirgi o‘yiningizdan qanchalik qoniqyapsiz?
- Albatta, xursandman, lekin hamisha yaxshilanishi talab etiladigan jihatlar topiladi. Tabiiyki, cho‘qqiga chiqishni xohlayman va buning uchun hali ko‘p ter to‘kishim, o‘z ustimda ishlashdan tinmasligim kerakligini yaxshi bilaman. Asosiysi, hozir Erik ten Xag qo‘l ostida o‘ynashdan o‘zgacha zavqlanyapman. Aytgandimdek, u klubga yangi g‘oyalar bilan keldi. Deylik, mening maydondagi pozisiyam ham o‘zgarib turibdi. Alohida aytishim kerak, menga maydonda aynan turli rollarni bajarish yoqadi.
- Ha, murabbiy sizga ayniqsa, chap qanot himoyachisi va markaziy yarim himoyachi nuqtalarida katta ishonch bildirmoqda. Bu qo‘shimcha turtki bergani tayin. Umuman, himoyachi sifatida qobiliyatingiz rivojlanganini sezyapsizmi?
- Ha, albatta. Murabbiy qayerda o‘ynashimni xohlasa, shunga tayyorman. Takrorlayman, maydonda yangi rolni mamnuniyat bilan bajaraman. O‘ylashimcha, turli pozisiyada o‘ynash, o‘yinning o‘zgacha tomonlarini o‘rganish futbolcha fikrlash darajasini oshiradi. Mana, 3 nafar markaziy himoyachi taktik sxemasida o‘ynab ko‘rdim. Ilgari orqa chiziq markazida o‘ynaganman, lekin chizma boshqacha edi - ikki himoya taktikasi. Asosiysi, bunda o‘zimni juda qulay his qilardim. Agar murabbiy lozim topsa, bunday chizmada nimalar qila olishim mumkinligini ko‘rsatishdan xursand bo‘lardim.
- Shartnomangizni yangilash bilan «qizil iblislar» safida 10 yildan ortiq faoliyat yuritishingizni tasdiqlatdingiz. Bunday davomiylik hammaga ham nasib etmaydi, ayniqsa, «Old Trafford»da...
- Albatta, bu natija faxrlanishga arziydi. O‘ylaymanki, «MYU» nafaqat o‘zim, balki oilam uchun ham dunyodagi eng katta va eng yaxshi klubdir. Bu yerda uzoq vaqt bo‘lish, «qizil iblislar» futbolkasida «Old Trafford»da tez-tez o‘ynash - chinakam sharaf. Yangi shartnoma men uchun haqiqiy imtiyozdir, demak, jamoam uchun borimni berishda davom etaman. Maqsad bitta - «MYU»ga APL va CHL kuboklarini yutishda imkon boricha yordam berish.
- Hozir 27 yoshdasiz, shunga qaramay, jamoaning faxriy futbolchilaridan va kiyinish xonasi yetakchilaridan birisiz. Faxriy bo‘lish qanday ekan?
- Faxriylarning yoshlarga nimanidir o‘rgatib borishlari juda muhim. «Old Trafford»ga kelganimda, yosh yigitcha edim va kattalar davrasida shug‘ullanish, o‘ynash mutlaqo boshqacha ekanligini yaxshi bilaman. Ya’ni bunday holatdan o‘tganman va jamoada faxriylar roli naqadar kattaligini yaxshi bilaman. Oddiy aytganda, o‘z yo‘limni unutmagan holda, tajribamni yosh yigitlar bilan baham ko‘rishga moyilman. Fikrimcha, murabbiy zimmamga yuklayotgan vazifalardan biri ham shu - yoshlarni oldinga boshlash.
- Bugungi Lyuk Shou bo‘lish yo‘lida ko‘p muammolarga yo‘liqqaningiz ayni haqiqat. Murakkabliklar sizni nechog‘li shakllantirdi?
- Ha, futbolda yetarlicha ko‘tarilish va pasayishlarni boshdan kechirdim. Alohida aytishim kerak, maydondagi qiyinchiliklar ortidan nafaqat futbolchi, balki shaxs sifatida ham o‘zim xohlagan darajada shakllandim, toblandim. Bunday buyuk klub tarkibidamisiz, tinmay o‘sishingiz shart, aks holda, asosiy guruhdan tushib qolasiz. «MYU»da o‘ynashning eng yaxshi tomoni shu - o‘sish, shakllanish! Bu yerda xohlasangiz-xohlamasangiz, yuksalish, yetuklik sari intilishga majbursiz.
- Hozirgi yetuklik jamoani har doim o‘zingizdan ustun qo‘yishingizda yaqqol namoyon bo‘ladi...
- Ha. Menimcha, bu ham bir maktab. Futbolda jamoa har qanday yulduzdan ustun hamisha. Binobarin, hammamiz bir katta jamoa ichidamiz, shunday ekan, asos birinchi o‘rinda turadi, baribir! Tabiiyki, har bir futbolchi mudom o‘yinlarda g‘alaba qozonish, sovrinlar yutishga intiladi, bunda ham jamoa manfaati 1-o‘rinda! Deylik, jarohatlanamanmi yoki yo‘q, har bir kurashda borimni berishim shart - jamoani ustun qo‘yish shu.
- «MYU»» muxlislari sizni hamisha o‘zgacha qo‘llab-quvvatlashadi. Ularga aytar so‘zlaringiz...
- Qo‘llab-quvvatlov uchun katta rahmat! Buni yuksak qadrlayman. Fanatlar ayniqsa, joriy mavsum qo‘llab-quvvatlash darajasini keskin oshirishdi va endi bunga katta sovrinlar yutish bilan javob berishdan umidvormiz. Muxlislarga yana nima deyishim mumkin? Bizni qo‘llab-quvvatlashdan charchashmasin. Shaxsan men ularni quvontirish yo‘lida klub uchun borimni beraman hamisha.
- Mana, 2027 yillagacha mo‘ljallangan shartnomangiz naqd. Buyog‘iga nima qilmoqchisiz?
- Hozir xotirjam tortish vaqti emas. Hammamiz qattiq ishlashimiz kerak. Erik ten Xagning eng yaxshi jihati shuki, u loqaydlik yoki xotirjamlikka aslo yo‘l qo‘ymaydi. Kimdadir standart talablar pasaydimi, darhol bu borada chora ko‘radi, aniq ko‘rsatmalar beradi. Qisqasi, har bir futbolchi o‘z darajasini oshirib borishi, ko‘rsatkichlarni izchil yaxshilashi shart. Menimcha, bunday talab avvalo, futbolchilar uchun muhim.
M.PO‘LATOV tayyorladi
