“Turon” bosh murabbiyi Baxtiyor Ashurmatov iste’foga chiqarildi. Ashurmatov O‘zbekiston Superligasi 2023 yilgi mavsumida o‘z vazifasidan ozod etilgan to‘rtinchi murabbiyga aylandi. “Daryo” joriy mavsum lavozimini tark etgan murabbiylar haqida so‘z yuritadi.

Luisma Ernandes (“Metallurg”)

“Metallurg”ning ispaniyalik murabbiyi Luisma Ernandes Superliga 3-turidan keyin oilaviy sharoiti tufayli iste’foga chiqdi. Jamoa bungacha 1-turda “Neftchi”ga, 2-turda esa “Navbahor”ga yirik 0:3 hisobida mag‘lub bo‘lgandi. Toshkent viloyati klubi 3-turga kelib, musobaqadagi ilk g‘alabasini “Qizilqum”ga qarshi o‘yinda qo‘lga kiritgandi.

Ernandesning o‘rnini chernogoriyalik murabbiy Vesko Steshevich egalladi. Yangi murabbiy qo‘l ostida jamoa 1 g‘alaba, 1 durang va 1 mag‘lubiyat qayd etdi.

Hakim Fuzaylov (“Buxoro”)

O‘zbekiston Superligasi 2023 yilgi mavsumini “Buxoro” murabbiyi sifatida boshlagan Hakim Fuzaylov 4-turdan so‘ng salomatligi tufayli o‘z xohishiga ko‘ra iste’foga chiqdi. Buxoroliklar Fuzaylov qo‘l ostida 1 ta g‘alaba va 3 ta mag‘lubiyat qayd etdi. Jamoa “Turon” ustidan g‘alaba qozongan bo‘lsa, “Qizilqum”, “Nasaf” va “Surxon”ga mag‘lub bo‘ldi. Ulug‘bek Baqoyev “Buxoro” jamoasi bosh murabbiyiga aylandi. Hakim Fuzaylov esa klubda maslahatchi murabbiy sifatida faoliyat yuritadigan bo‘ldi.

Yorqin Nazarov (“So‘g‘diyona”)

“So‘g‘diyona” murabbiyi Yorqin Nazarov ham Superliga 4-turidan keyin iste’foga chiqdi. Bungacha jizzaxliklar 1 durang va 3 mag‘lubiyat qayd etib, turnir jadvalida so‘nggi o‘rinda borayotgandi. Jamoa “Olimpik” bilan durang o‘ynadi, “Bunyodkor”, “Neftchi” va “Navbahor”ga mag‘lub bo‘ldi. Klubda Yorqin Nazarovning o‘rnini Ivan Boshkovich egalladi.

Baxtiyor Ashurmatov (“Turon”)

“Turon” jamoasi murabbiyi Baxtiyor Ashurmatov O‘zbekiston Superligasi 6-turidan o‘rin olgan “Neftchi”ga qarshi uchrashuvdan oldin iste’foga chiqarildi. Yaypan klubi musobaqada 3 mag‘lubiyat va 2 durang qayd etib, turnir jadvalida 13-o‘rinda bormoqda. “Turon” Ashurmatov qo‘l ostida “Buxoro”, “Nasaf” va “Olimpik”ka mag‘lub bo‘lgan bo‘lsa, “Bunyodkor” va “Surxon” bilan durang o‘ynadi. “Neftchi”ga qarshi uchrashuvda Yaypan klubini jamoada ishlab kelgan murabbiylar Mirjalol Jo‘rayev va Azizxon Isomiddinovlar boshlab tushadi.

Chempionatning endigina 5 turi ortda qoldi va hozirga qadar 4 nafar mutaxassisga chiqish eshiklari ko‘rsatildi. Ma’lumot uchun, butun boshli 2022 yilgi mavsum davomida 11 nafar murabbiy o‘z lavozimidan ozod etilgandi.