Todd Boeli «Brayton»ga (1:2) qarshi o‘yindan so‘ng «Chelsi» futbolchilarining kiyim almashtirish xonasiga tashrif buyurgan.
Ma’lum bo‘lishicha, klub xo‘jayini liganing 31-turidan o‘rin olgan o‘yindan so‘ng kiyinish xonasida bir soatga yaqin vaqt o‘tkazgan.
Unda Boeli bosh murabbiy Frenk Lempardning nutqidan so‘ng so‘z oldi. Ishbilarmon klubning turnir jadvalining quyi qismidagi o‘rni va so‘nggi natijalarini «sharmandali» deb atadi va jamoaning g‘alaba qozonishini ta’minlash uchun 600 million funt sarflanganini, biroq hozircha bu umidlarni oqlamaganini ochiq aytdi.
Shu bilan birga, u Chempionlar ligasida «Real»ga qarshi javob o‘yini mavsumni saqlab qolish, sharmandali o‘yinlarga chek qo‘yish uchun muhim imkoniyat ekanligini ta’kidladi.
