Italiya «A» seriyasi 28-turidan o‘rin olgan «Inter» - «Fiorentina» o‘yinida ta’sirchan bir holat kuzatildi.

Mehmon jamoa vakili oddiy vaziyatda simulyasiya ishlatib, «neradzurralar» va stadiondagi muxlislarda kuchli e’tiroz tug‘dirdi. Endi ma’lum bo‘lishicha, Luka Ranyeri o‘sha holatda aniq maqsadni ko‘zlab, vaqt cho‘zgan ekan...

APLdan farqli o‘laroq, «A» seriyada iftorlik vaqtiga to‘g‘ri keladigan o‘yinlarda kichik tanaffus e’lon qilishga rasman ruxsat berilmagan. Xullas, «Inter» - «Fiorentina» bahsida Luka Ranyeri ro‘zador klubdoshiga og‘iz ochib olish imkoniyatini yaratish uchun o‘zini jarohatlangandek ko‘rsatdi. Qoyil! G‘arbda muqaddas Ramazon oyi va kun davomida yeb-ichishdan ti­yilgan musulmon futbolchilarga nisbatan hurmatning yana bir namunasi. Ranye­rining simulyasiyasi o‘ta kuchli reaksiya keltirib chiqargani sababiga kelsak, oxirgi vaqt­lar ishlari orqaga ketgan «Inter» 0:1 hisobida yutqazayotgandi va yakunda mag‘lubiyatni tan oldi.

O‘sha pallada ko‘pchilik simulyasiya mohiyatini tushunmadi ham. Muxlislar faqat o‘yindan so‘ng ijtimoiy tarmoqlarda ikkinchi bo‘limga qo‘shib berilgan daqiqalarda kuzatilgan «simulyasiya sahnasi» bo‘­yicha haqiqatga mos taxminni ilgari surishdi: «Fiorentina» vakili Luka Ranyeri bejiz o‘zini jarohatlangandek ko‘rsatib, maydonga yotib olmadi. U shu tariqa ro‘zador klubdoshi Sofian Amrabatga og‘zini ochib, yengil tamaddi qilib olish imkoniyatini yaratdi». Darhaqiqat, shunday: Ranyeri maydonda yotganida, kameralar Amrabat chetga chiqib, ozgina suv ho‘plagani va banan yeb olganini «ushladi». Bu pallada Ranyeri «Inter» zaxira o‘rindig‘idagi futbolchilarning jiddiy e’tirozlariga parvo ham qilmadi. To‘g‘ri, ikki vaziyatni o‘zaro bog‘lamayotgan muxlislar ham bor. Ularning xulosalariga ko‘ra, Ranyeri jamoasi hisobda oldinda borayotganidan kelib chiqib, shunchaki, vaqt «o‘ldirish» niya­tida ayyorlik ishlatgan.