"Liverpul" hujumchisi Roberto Firmino faoliyatini "Inter"da davom ettirishi mumkin, deb xabar beradi Gazzetta dello Sport.

Oldinroq "Inter" ijara asosida o‘ynayotgan Romelu Lukakuni sotib olmasligi haqida xabarlar tarqalgan edi. Manbaning xabariga ko‘ra, milanliklar rahbariyati belgiyalik futbolchining o‘rniga nomzodlar ro‘yxatini allaqachon tuzib bo‘lgan, uning tarkibiga Firmino ham kiritilgan.

Mart oyida braziliyalikning agenti hujumchining shu yozda "Liverpul"dan ketishini e’lon qilgandi. Firmino joriy mavsum “Liverpul” safida barcha turnirlar doirasida 33 ta o‘yinda maydonga tushib, 11 ta gol urdi va 5 ta golli uzatmani amalga oshirdi.