Yarim himoyachi Meyson Mauntning kelajagi muhokama mavzusi bo‘lib qolmoqda. 24 yoshli futbolchining "Chelsi" bilan shartnomasi 2024 yilning o‘rtalariga qadar tuzilgan va agar tomonlar yaqin orada shartnomani uzaytirish borasida kelishmasa, klub katta ehtimol bilan yozda Mauntni sotishi mumkin.
Mauntni qo‘lga kiritish uchun birinchi raqamli da’vogar bu "Liverpul". Football Insider xabariga ko‘ra, "qizillar" allaqachon 24 yoshli futbolchi uchun shartnoma tayyorlab qo‘ygan va u klub rahbarlari tomonidan ma’qullangan. Qayd etilishicha, Yurgen Klopp Meysonni o‘z jamoasida ko‘rishni juda xohlaydi.
Qo‘shimcha qilamizki, "Chelsi"ning asosiy jamoasi uchun Maunt 195 o‘yin o‘tkazib, 33 gol urgan va 37 golga assistentlik qilgan. Transfermarkt portali futbolchini 65 million yevroga baholamoqda.