"Arsenal", "MYU", "Manchester Siti" va "Chelsi"ning hozirgi futbolchilari ichida hali faoliyatini yakunlamay turib, murabbiylik sertifikatiga o‘qiyotganlar bor. O‘tmishda ham shunday bo‘lgan. Butun faoliyatini futbolga bag‘ishlab, bir kun kelib, butsalarini devorga ilganida ham, ko‘ngli futbolda qoladigan futbolchilar, murabbiylikka intilishadi. Quyida ana shunday shaxslar keltirib o‘tiladi.
Granit Jaka
"Arsenal"ni biladiganlar sezganki, Jaka murabbiylikka qiziqadi. Futbolchining o‘zi bu haqida shunday deydi: "Siz maydonni boshqacha ko‘ra boshlaysiz. Agarda futbolchi bo‘la turib, murabbiylik kurslarida o‘qiy boshlasangiz, bu narsa sizda ikkita narsani o‘zgartiradi. Birinchisi, bu siz hamma narsaga murabbiy ko‘zi bilan ham qaray boshlaysiz. Ikkinchisi esa maydonga tushganingizda, ham murabbiy, ham o‘yinchi spektridan vaziyatlarni ko‘rasiz".
Jakaga o‘zi kabi yosh bo‘lgan Mikel Arteta qo‘l-ostida harakat qilayotgani ish bermoqda. U UYEFAning B sertifikatiga ega.
Oleksandr Zinchenko
Aslini olganda, Jaka "Arsenal"dagi yagona murabbiylikka intilayotgan vakil emas. Sedrik, Elneni va Xolding ham o‘tgan yili B lisenziyasiga ega bo‘lgan. Zinchenko ham 26 yoshda murabbiylikka qiziqa boshladi. Ukraina terma jamoasi a’zosi B kategoriyali diplom olishga erishgani aytiladi. Zinchenkoning bu ishi unga Ukrainadagi quyi ligalarda ishlash imkonini beradi.
Xuan Mata
Mata murabbiylik kurslariga "Manchester Yunayted"da o‘ynab yurgan paytlarida bora boshlagan. Bu haqida uning o‘zi shunday degandi: "Men murabbiylikni o‘rgana boshladim. Bo‘sh vaqtimni behuda sarflagim kelmayapti. Har bir 30 dan oshgan futbolchi uchun keyin nima qilishni o‘ylab ko‘rish muhimdir. Albatta, imkonim yetgancha, maydonda futbolchi bo‘lib qolaman. Ammo doimo ham shunday bo‘lmaydi".
Tiagu Silva
38 yoshida ham yuqori darajadagi futbol ko‘rsata olayotgan futbolchi, "Chelsi"ga kelganidan beri murabbiylikka o‘qimoqda. Silvaning bu boradagi qobiliyati haqida Braziliya terma jamoasining sobiq ustozi Tite shunday degandi: "Undan yaxshi murabbiy chiqadi. Silva muammolarni osonlik bilan hal qila oladi. Uning kerakli paytda to‘g‘ri qaror qabul qilishi, meni hayron qoldirgan".
Gael Klishi
Klishi hali ham futbolchilik faoliyatini tugatgani yo‘q. Sobiq "Arsenal" va "Manchester Siti" futbolchisi Shveysariyada harakat qiladi. Bir necha yillardan beri u murabbiylikka o‘qimoqda. Futbolchining o‘zi murabbiylik bilan shug‘ullanish borasida shunday degandi: "Men buni xohladim. Negaki, 20 yildan beri futbolda yurib, keyin boshqa sohaga o‘tib ketish juda qiyin. Boz ustiga, men ishimni sevaman. Kelajakda Venger va Gvardioladan o‘rgangan narsalarimni amalda qo‘llamoqchiman". Klishida UYEFA A lisenziyasi bor.
Enzli Meytlend-Naylz
25 yosh bo‘lishiga qaramay, ingliz futbolchisi murabbiylik kurslarini o‘tayotgani haqida ma’lum bo‘ldi. "Sautgempton" himoyachisi shunday deydi: "Sport uchun nimadir qilishim kerak edi. Shu sabab murabbiylikka o‘qiy boshladim. Hozirdan kelajakda murabbiy bo‘laman deya olmayman. Ammo futbol haqidagi bilimlar aql uchun ozuqa bo‘ladi. O‘yinchilarni aqliy tayyorgarligi hammasidan muhim va menga aynan shu kabi narsalar o‘rgatiladi".
ISMATOV J
