«Bavariya» Nagelsmanni iste’foga chiqarib, Tuxelni tayinlagan paytda jamoa YECHL va Germaniya kubogida qatnashayotgan, Bundesligada esa, «Borussiya»dan 1 ochko ortda bo‘lsa-da, o‘z maydonida o‘zaro o‘yin kutib turgandi.
Hozir ham «Bavariya» 1 ochko orqada, ammo endi hammasi «Borussiya» qo‘lida - o‘zaro o‘yin o‘tib ketgan. Dortmundliklar keyingi 5 turda g‘alaba qozonsa kifoya. Raqiblar esa, bugun «Bavariya»ni yutgan «Mayns»dan tashqari, hammasi 10-o‘rindan pastdagi jamoalar.
YECHL va Germaniya kubogidan ham chiqib ketildi. Ya’ni, bir oy oldin trebl qilishi mumkin bo‘lgan jamoa endi mavsumni umuman sovrinsiz tugatishga yaqin. Yagona sovrin ham yuqorida aytilganidek, Dortmundga bog‘liq.
Doim sokin, barqaror va muvozanatli menejmenti bilan Yevropada o‘rnak bo‘lgan «Bavariya» turli memlar va kulgili hazillar markazida qoldi. Ruminigge, Kan, Salixamidjich... Hali yozda «Alyans Arena»da juda ko‘p kursilar silkinishi aniq. Zero, Germaniyadagi klublar Boeli kabi xujayinlar qo‘lida qolmagan, u yerdagi tizim bo‘yicha barchasini muxlislar nazorat qiladi. Shunday alfozda boy berilgan mavsumning hisobi so‘ralishi shubhasiz.
