Yaponiyalik 56 yoshli futbolchi Kadzuyoshi Miura 2023 yilning fevral oyida ijara asosida Portugaliyaning ikkinchi divizion klubi “Oliveyrense”ga o‘tdi. Tomonlarning o‘zaro kelishuvi 2023 yilning yoziga qadar mo‘ljallangan.

“Oliveyrense” Kadzuyoshi Miura faoliyatidagi 16-klub hisoblanadi. Shuningdek, Portugaliya jamoasi futbolchining beshinchi xorijiy jamoasi bo‘ldi. Avvalroq u Braziliya, Xorvatiya, Italiya va Avstraliya klublarida o‘ynagan.

22 aprel, shanba kuni tajribali hujumchi Portugaliya ikkinchi divizionida debyut qildi. Miura “Oliveyrense” tarkibida “Akademiko Vizeu”ga qarshi o‘yinda zaxiradan maydonga tushdi.

Shu bilan Kadzuyoshi Portugaliya futbolida maydonga tushgan eng keksa futbolchi bo‘ldi. Yaponiyalik o‘yinchi 56 yosh-u 55 kunligida Portugaliyada debyut qildi.

2017 yilning fevral oyida Kadzuyoshi Miura 50 yoshga to‘lganida “Yokogama” safida “Matsumoto Yamagi”ga qarshi o‘yinda maydonga tushgandi. Natijada Stenli Metyuzning rekordini yangilagan va professional futbolda faoliyat olib borayotgan eng keksa futbolchiga aylangan.

“Doim shunday yoki boshqa holatda futbol o‘yinlarida ishtirok etaman, deb o‘ylayman. Qancha ko‘p o‘ynashimni bilmayman. Balki ertaga faoliyatimni yakunlarman, balki keyingi 2–3 yilda. 18 yoshimda Braziliyada birinchi professional shartnomamni imzolaganimda, bu yoshga qadar o‘ynayman deb o‘ylamagandim. Men buni uddalay oldim, chunki har yili futbolga bor kuchimni berdim”, — degandi Miura 2021 yilda.