Qatar shayxi Jasim bin Hamad Al Tani "Manchester Yunayted" uchun 5 milliard funt sterlingdan ko‘proq (5,7 milliard yevro) berishga tayyor, deb xabar beradi CBC Sport jurnalisti Ben Jeykobs.
Manbaga ko‘ra, Al Tani klubni sotib olish bo‘yicha yakuniy taklif bilan chiqqan. Jasimning taklifi, shuningdek, "Manchester Yunayted"ga katta miqdorda qo‘shimcha mablag‘ va infratuzilmani sarmoya qilish rejasini ham o‘z ichiga oladi. Al Tani "Manchester Yunayted"ning 100% aksiyalarini sotib olmoqchi.
Hozirgacha sport klubini sotib olish bo‘yicha eng katta bitim 2022 yilda yakunlangan, o‘shanda NFL klubi "Denver Bronkos" 4,65 milliard dollarga (3,75 milliard funt sterling) sotilgan.
Sky Sports xabariga ko‘ra, ser Jim Ratkliffning "Manchester Yunayted" aksiyalarining aksariyat qismini sotib olish bo‘yicha taklifi ham berilgan. Qayd etilishicha, gleyzerlar "MYU" uchun taxminan 6 milliard funt olmoqchi.
Ayni paytda klub 60 ochko bilan Premyer-liga turnir jadvalida 4-o‘rinda bormoqda.
