"Arsenal" kelasi mavsumda Chempionlar ligasida ishtirok etishi aniq bo‘lganidan so‘ng yozda o‘z tarkibini sezilarli darajada kuchaytirmoqchi.

The Telegraph xabariga ko‘ra, "kanonirlar" "Chelsi" bilan shartnomasi 2024 yilning yoziga qadar mo‘ljallangan yarim himoyachi Meyson Mauntga qiziqish bildirmoqda. "Arsenal" angliyalik futbolchini sotib olish borasida dastlabki muzokaralarni o‘tkazdi. Shuningdek "Liverpul" ham Mauntni sotib olmoqchi.

"Arsenal"ning yozdagi asosiy maqsadi "Vest Xem" sardori Deklan Rays hisoblanadi. Londonliklar qishda qo‘lga kiritishga harakat qilgan "Brayton" yarim himoyachisi Moyses Kaysedo ehtimoliy maqsadlar ro‘yxatida qolmoqda. "Arsenal" shuningdek "Valyadolid"ning o‘ng qanot himoyachisi Ivan Fresnedaga ham qiziqish bildirmoqda.

"Arsenal"ning transfer faoliyati va klub byudjetiga yozda bir nechta o‘yinchilarning ketishi ta’sir qiladi. Xususan, “Nyukasl” va "Manchester Siti" Kiran Tirniga, Yevropaning ko‘plab klublari “Reyms”da ijara asosida to‘p surayotgan hujumchi Folarin Balogunga qiziqish bildirmoqda.

Nikolas Pepening yana "Arsenal"da o‘ynashi dargumon. Uning shartnomasi 2024 yilning yoziga qadar amal qiladi, shuning uchun londonliklar uni katta summaga sotishlari qiyin bo‘ladi. Mavsum oxirida "Arsenal" Pablo Marini "Monsa"ga 6 million funtga sotadi, agar Italiya klubi A Seriyadan tushib ketmasa va himoyachi sotib olish uchun kerakli miqdordagi o‘yin o‘tkazsa.

Hozirda "Arsenal" Angliya Premyer-ligasi turnir jadvalida 33 o‘yinda 75 ochko to‘plagan holda ikkinchi o‘rindagi "Manchester Siti"dan 2 ochko oldinda borib, peshqadamlik qilmoqda. Ammo "shaharliklar"ning hisobida yana 2 ta o‘yin zaxirada bor ("Vest Xem" va "Brayton"ga qarshi).