"MYU" yozda bir qancha yirik xaridlarni amalga oshirishi mumkin. Xabarlarga ko‘ra, Erik ten Xag hujum uchun jiddiy yurishlar qiladi. U yangi mavsum uchun "PSJ"dan Neymarni, "Tottenxem"dan esa Xarri Keynni xarid qilishi ehtimolga yaqin. Buning uchun katta pul kerak bo‘ladi, albatta. Klub yozda tarkibdan tashqari rahbariyatni ham o‘zgartiradi. Gleyzerlar jamoani tag-tugi bilan Shayx Yassim Hamad al-Tani egaligidagi kompaniyaga sotishi mumkin. Agar shunday bo‘lsa, arablarga yirik xaridlarni qilish muammo bo‘lmaydi. Shayx Yassim "qizil iblislar"ni avvalgi mavqeyiga qaytarish uchun o‘z pullarini ayamaydi.
Bu ishni qatarlik milliarder, Neymar xarididan boshlashi aytilgan. Braziliyalik hujumchi "PSJ"ni tark etishga yaqin turibdi. Bunga futbolchining jarohatga moyilligi, katta maoshi va klubning maqsadlari o‘zgarayotgani sabab qilib ko‘rsatilgan. Bunday katta transfer arablar qaramog‘odagi "MYU"ni kuchsizlatirib qo‘ymaydi. Aksincha, mankunianliklar keyingi e’tiborini Xarri Keyn xaridiga qaratadi. Angliya terma jamoasi a’zosi hali ham "MYU" ro‘yxatidan muqim o‘ringa ega bo‘lib turibdi. Agarda mana shu ikki yuqori kalibri futbolchilar "Manchester Yunayted"ga tashrif buyursa, ten Xag ixtiyorida katta yulduzli tarkib yuzaga keladi.
Neymar jamoaning o‘ng qanot hujumidan joy olishi mumkin. Xarri Keynning markaziy hujumda bӯlishi, Markus Reshfordga o‘zi sevgan chap qanotda o‘ynash imkonini beradi. Tuzilajak hujumkor 4-3-3 taktik sxemasida darvozani David De Xea egallaydi. Qanotlarga Diyegu Dalot va Lyuk Shou joylashtiriladi. Markaziy mudofaadan Rafael Varan va Lisandro Martines o‘rin egallaydi. Yarim himoyada Kazemiro-Eriksen-Fernandesh triosi harakat qiladi. Aytish mumkinki, o‘z davrining ilk transferlar oynasida shaxy Yassim katta xarajatdan qochmaydi. Shu sabab "Manchester Yunayted"da yanada ko‘proq xaridlar qilish imkoniyati paydo bo‘ladi.
Qayd etilishicha, "MYU" darvozaga "Brentford" posboni David Rayyani, himoyaga esa "Bayer Leverkuzen"dan Jeremi Frimpongni sotib olishi ko‘zda tutilgan. Bunda Rayya De Xeani o‘rnini egallaydi. Ispaniyalik afsona yozda erkin agentga aylanishi kutilmoqda. Frimpongga esa o‘ng qanotdagi Diyegu Dalot pozisiyasi taqdim etiladi. Portugaliyalik futbolchi hali klub bilan yangi shartnomaga erisha olmadi. Yangi rahbariyatning klubga in’om qiladigan eng katta sovg‘asi bu Jud Bellingem bo‘lgan bo‘lardi. "Borussiya Dortmund" futbolchisiga "qizil iblislar" uzoq davrlardan beri qiziqish bildirib kelayapti. 19 yoshli yarim himoyachi "MYU"da Kazemiro va Fernandesh bilan hamkorlikda harakatlanishi mumkin bo‘ladi.
ISMATOV J.
