Pro liga 7-turi doirasidagi «Xorazm» - «Dinamo» (0:1) uchrashuvidan keyin dastlab jamoamiz bosh murabbiyi Vadim Abramov jurnalistlar savollariga javob qaytardi.

«Barcha guvohi bo‘ldi, o‘yin ikki jamoa uchun ham qiyin kechdi. So‘nggi daqiqalarda omad bizga kulib boqdi. Hujumchimiz chiroyli gol muallifiga aylandi. Kojo o‘yin davomida osonroq vaziyatdan gol kirita olmay, o‘yin oxirida qiyin vaziyatni golga aylantirdi. Qiyin bahsda muhim 3 ochkoni qo‘lga kiritdik. «Xorazm» jamoasiga keyingi o‘yinlarda ham bizga qarshi maydonga tushgandek to‘p surishini tilab qolaman. Samarqanddan shuncha yo‘l bosib kelib, bizni qo‘llab-quvvatlagan jonkuyar muxlislarga rahmat deyman.

Superliga yo‘llanmasi uchun kurashadigan jamoalar guruhi hali alohida ajralib chiqmadi. Bizdan tashqari, «Lokomotiv» va «Qo‘qon-1912» ham da’vogarlar qatorida. Hozirgi vaziyatda hammasi tezda o‘zgarishi mumkin.

Kojo Joelning o‘yini haqida? U bor imkoniyatini ishga solishga intilmoqda. O‘z gollari bilan jamoaga yordam bermoqda. U shunday davom etishi kerak. Bugun jarima zarbasini tepishni o‘z bo‘yniga olib, qoyilmaqom ijro etdi. U o‘yin davomida ham ikkita yaxshi vaziyatni golga aylantirishi mumkin edi. Ammo maydonning holati yaxshi emasligi ikki jamoa o‘yinchilariga ham qiyinchilik tug‘dirdi.

Odatda, bunday maydonlarda yaratadigan, to‘pni nazorat qiladigan jamoa emas, himoyalanadigan jamoaga osonroq bo‘ladi.

Yevgeniy Nazarov va Erkin Boydullayev qachon safga qaytadi? Endi jamoamiz oldida katta tanaffus yuzaga keladi. Chunki navbatdagi turda dam olamiz. Shu bois, ular keyingi o‘yinimizda safda bo‘lishadi.

Ha, Xorazmga kelish men uchun yoqimli. Chunki futbolchilik faoliyatimdagi ilk klublardan biri «Narimonov» jamoasi edi. Muxlislar hali ham unutmay, bugun meni yaxshi kutib olganliklari men uchun yoqimli holat bo‘ldi. Xorazmlik muxlislardan ham minnatdorman. Jamoaga omad tilab qolaman, - deydi Vadim Karlenovich o‘yindan keyin.

Usmon Ibodov yozib oldi.