"Brayton" yarim himoyachisi Aleksis Makallister "Liverpul"ga o‘tishga yaqin turibdi.

24 yoshli futbolchi yozgi transfer oynasida albatta klubini o‘zgartiradi. "Manchester Yunayted" va "Liverpul" uzoq vaqtdan beri unga asosiy da’vogarlar sanalib kelgan. Insayder Fabrisio Romanoning so‘zlariga ko‘ra, yaqinda mersisaydliklar Argentina terma jamoasi yarim himoyachisining transferi bo‘yicha muzokaralarda oldinga siljishgan. Klub allaqachon futbolchini o‘z loyihasi bilan tanishtirgan. Makallisterning o‘zi imkon qadar tezroq o‘tishni rasmiylashtirishga umid qilmoqda.

Joriy mavsumda jahon chempioni “Brayton” safida 33 ta o‘yin o‘tkazib, o‘nta gol va ikkita golli uzatmaga mualliflik qilgan. Transfermarkt uning narxini 42 million yevroga baholamoqda.