"Liverpul" 2023 yilning yozida tarkibni yangilashi kerak. Jamoani shartnoma muddati tugaydigan bir qator o‘yinchilar tark etadi va klub yangi futbolchilar bilan bitim imzolashi kerak. Shulardan biri Qatardagi Jahon chempionati qahramoni – braytonlik Aleksis Makallister bo‘lishi kutilmoqda.
Yevropaning top-insayderi Fabrisio Romano ijtimoiy tarmoqlarda argentinalik yarim himoyachining "Liverpul"ga o‘tishga qiziqayotganini aytdi. Qayd etilishicha, yakuniy kelishuvga erishish uchun hali kelishib olinishi kerak bo‘lgan tafsilotlar mavjud. Muzokaralar keyingi ikki hafta ichida davom etadi.
"Men hozir hech narsa deya olmayman", deya javob berdi Yurgen Klopp Makallisterning transferi haqidagi savolga. "Brayton" yetakchilardan biri uchun taxminan 60 million yevro talab qilmoqda. Bu past narx emas, lekin Premyer-liga va futbolchining xizmatlari uchun yetarlicha. “O‘ylashimcha, u keyingi transfer oynasida klubini o‘zgartiradi. Biz uning qayerga borishini hozircha bilmaymiz, umuman olganda, muzokaralar endigina boshlanmoqda, lekin, katta ehtimol bilan, Aleksis iyul oyida boshqa jamoada o‘ynaydi”, - dedi avvalroq Aleksisning otasi Karlos Makallister.
Qarama-qarshi yo‘nalishda esa yarim himoyachi Jeyms Milner “Brayton”ga kelishi kutilyapti. 37 yoshli angliyalik futbolchining klub bilan shartnomasi yozda nihoyasiga yetadi, shuning uchun u istalgan variantni tanlashi mumkin. Va u “Brayton” bilan shartnoma tuzishga qaror qildi. 37 yoshli angliyalikni tushunish mumkin: u kamdan-kam holatda asosiy tarkibda maydonga tushadi va hali faoliyatini yakunlamoqchi emas. “Aytishim mumkinki, men u bilan ajoyib suhbatlar o‘tkazdim. U uni qanchalik qadrlashimni biladi, bu uning qarori. Milner bo‘lmaganida, so‘nggi 7,5 yil ichida hech qanday sovrin yutmagan bo‘lar edik", - dedi Klopp futbolchining ketishi haqidagi savolga.
Makallister - "Liverpul"ni kuchaytirish uchun ajoyib imkoniyat. Argentinalik o‘zining professionalligi bilan ajralib turadi, shiddatli futbolga jismonan tayyor, pressing va himoyada yaxshi ishlaydi. Makallister penalti tepishda ham yaxshi. Argentinalik futbolchi "Brayton"ning Premyer-ligadagi eng yaxshi to‘purari (9 gol, 6 tasi 11 metrdan).
“Chaykalar"ning maydon markazida Aleksis top klubga o‘tish uchun yana bir nomzod Moises Kaisedo bilan juftlikni tashkil etdi. Agar Makallisterni “Liverpul” yarim himoyachilari bilan solishtiradigan bo‘lsak, unga eng o‘xshashi jamoaning sobiq futbolchisi Jorjinyo Veynaldumdir. Niderlandiyalik futbolchi xuddi shunday funksionallikka ega edi, yarim himoyada butunlay boshqa pozisiyalarda joylashishi mumkin edi.
Makallisterning eng yaxshi futboli ,albatta, Qatardagi jahon chempionati edi. Aynan shu turnirda argentinalik nomi hammaga ma’lum bo‘ldi. Saudiya Arabistoni bilan birinchi o‘yinda (1:2) maydonga tushmagan, qolgan barcha uchrashuvlarda maydonga tushib, g‘alaba bilan yakunlangan.
"Liverpul" yangi o‘yinchilarni qo‘lga kiritish jarayonida. Klopp rahbariyatga futbolchilarni 8 iyulda boshlanadigan mavsumoldi birinchi yig‘in oldidan tayyorlamoqchi ekanligini aytdi. Yaqin kelajakda transferlar haqida ma’lumotlar oqimi kuchayadi. Ammo birinchi potensial shartnoma ham muxlislarda jamoaning keyingi mavsumdagi istiqbollari haqida ishonch hosil qilishi mumkin.
