Toshkentda o‘tayotgan boks bo‘yicha jahon chempionatining yarim final bellashuvlari davom ettirilmoqda. Hozirgina 75 kg vazndagi vakilimiz A’loxon Abdullayev final yo‘llanmasi uchun braziliyalik Vanderley Pereyraga qarshi jang qildi.

Dastlabki ikki raund bir xil ko‘rinishda bo‘ldi: A’loxon bo‘limlar boshida yuqori ishtiyoq evaziga bir nechta kuchli zarbalar bergan bo‘lsa, raundlarning ikkinchi yarmida raqib ko‘proq ochko beruvchi zarbalarga ahamiyat qaratdi. Natijada so‘nggi raund oldidan hisob teng bo‘lib turdi.

Uchinchi bo‘limda esa Abdullayevda biroz charchoq sezilgan bo‘lsa, Pereyra konsentrasiyani yo‘qotmagan holda A’loxonga nisbatan ko‘proq zarba bera oldi. Yakuniy baholar — 1:4 (30:27, 28:29, 28:29, 28:29, 28:29).

Shu tariqa, A’loxon Abdullayev o‘zi uchun debyut hisoblangan jahon chempionatida bronza medalini qo‘lga kiritdi.