Toshkentda bo‘lib o‘tayotgan boks bo‘yicha jahon chempionatida yarim finalning kechki dasturidan o‘rin olgan janglar o‘tkazilmoqda.

63.5 kg. vazndagi vakilimiz Ruslan Abdullayev armanistonlik nomdor sportchi Xovanes Bachkovga qarshi nihoyatda qiyin jang o‘tkazdi. Raqibning uslubini bilamiz, yaqin masofaga kirib olib, tinimsiz zarbalar beradi. Ruslanning uslubiga ham shunga yaqin bo‘lgani uchun raqib qarshisida esankirab qolmadi, tengma-teng jang qilishga intildi. Abdullayev tomonidan masofada berilgan qarshi zarbalar aniqroq bo‘ldi.

Ayniqsa, hamyurtimiz ikkinchi raundda ikkita kuchli zarba bilan Bachkovni ringga yiqitgani chiroyli chiqdi. Abdullayev ikki raundni o‘z foydasiga hal qilgan bo‘lsa-da, uchinchisiga kelib ancha charchab qoldi va so‘nggi bo‘limda ko‘p zarbalarni o‘tkazib yuborishga majbur bo‘ldi. Yakuniy baholar — 5:0 (29:28, 29:28, 29:28, 29:28, 29:28).

Ruslan Abdullayev JCHda debyut qilayotganiga qaramay final yo‘llanmasini qo‘lga kiritdi. Bachkov esa 4 karra bronza medali sohibiga aylandi.

Shu tariqa, jahon chempionatida finalga chiqqan bokschilarimiz soni oltitaga yetdi.