"Chelsi" "Napoli" hujumchisi Viktor Osimxenga qiziqish bildirmoqda.
Il Mattino nashri xabariga ko‘ra, Osimxen to‘liq tarkibda o‘ynagan "Napoli" - "Monsa" (0:2) uchrashuviga "Chelsi" skautlarining ikki a’zosi tashrif buyurgan. Qayd etilishicha, hujumchining bu o‘yindagi harakatlari "Chelsi" skautlarida unchalik taassurot qoldirmadi.
Shunga qaramay, London klubi allaqachon hujumchi transferi ustida ishlamoqda. Ayni vaqtda uning uchun kurashda "Manchester Yunayted" yetakchilik qilayotgani xabar qilingan.
"MYU" o‘tgan yilning avgust oyida "Napoli" prezidenti Aurelio De Laurentis bilan bog‘langan edi, ammo o‘shandan beri "Chelsi", "Nyukasl" va "PSJ" Osimxen uchun kurashga qo‘shildi. De Laurentis Parij prezidenti Nosir Al-Xelayfi bilan yaxshi munosabatda. Fabian Ruis, Edinson Kavani va Esekiel Lavesi neapolliklar klubidan "PSJ"ga o‘tishgan.
De Laurentis Osimxen bilan shartnomani uzaytirmoqchi bo‘lishi mumkin, ammo uning "Napoli"dagi maoshi unchalik yuqori bo‘lmaydi.
Klub Osimxenga "katta" taklif tushsa, uni sotadi. Agentlar allaqachon mumkin bo‘lgan kelishuv ustida ishlamoqda. Xuddi shu vositachilar "Napoli" himoyachisi Kim Min Chjeni "MYU"ga o‘tkazish ustida ham ishlashmoqda.
24 yoshli hujumchi joriy mavsumda "Napoli" safida barcha turnirlar doirasida 36 o‘yinda maydonga tushib, 28 gol va 4 golga assistentlik qildi.
