Ugo Lyoris klubdagi 11 yillik faoliyatidan so‘ng "Tottenxem"ni tark etadi.

L’Équipe nashri xabariga ko‘ra, darvozabon mavsum oxirida London klubini tark etish niyatida. Uning "Tottenxem" bilan shartnomasi 2024 yilgacha mo‘ljallangan, ammo klub Lyorisga faoliyatini davom ettirishning mumkin bo‘lgan variantlarini ko‘rib chiqishga imkon beradi.

Manbaga ko‘ra, Ugo 2022 yilgi jahon chempionatidan keyin ruhiy jihatdan charchagan. "Tottenxem"ning o‘sha paytdagi bosh murabbiyi Antonio Konte Lyorisdan 24 dekabr kuni – Fransiya terma jamoasi JCH-2022 finalidagi mag‘lubiyatdan 6 kun o‘tib mashg‘ulotlarga qaytishni so‘radi.

Qayd etilishicha, Lyoris faoliyatini yakunlash niyatida emas.

Avvalroq 36 yoshli darvozabonga Saudiya klubidan maoshi 3 baravar oshirilgan holda taklif tushgani haqida xabar berilgandi. "Tottenxem"da u haftasiga 100 ming funt maosh oladi.

May oyi boshida Lyoris jarohati tufayli mavsum oxirigacha safdan chiqqan edi.