"Inter" darvozaboni Andre Onananing agenti Albert Botines futbolchining kelajagi haqida gapirdi.
"Ushbu davrda taxminiy transferlar haqidagi mish-mishlar odatiy hol, ammo men bu haqda gapirmaslikni ma’qul ko‘raman, chunki hali juda erta", - deya agentning so‘zlarini keltiradi Goal. "Hozirda u bor e’tiborini faqat maydonga qaratgan. “Inter” bilan besh yillik shartnomamiz bor. Uning shartnomasida yana to‘rt yil bor. Hozir u bor e’tiborini faqat A Seriyaning qolgan o‘yinlari va Chempionlar Ligasi finaliga qaratgan. Uning uzoq muddatli shartnomasi bor, xavotir olmang. U juda baxtli, u Italiyaning eng kuchli jamoasida o‘ynaydi”.
27 yoshli kamerunlik futbolchi 2022 yilning yozidan buyon “Inter” safida to‘p surmoqda. Uning amaldagi shartnomasi 2027 yilning iyunigacha mo‘ljallangan.
Joriy mavsumda Onana barcha musobaqalarda 38 ta o‘yinda maydonga tushib, 30 ta gol o‘tkazib yuborgan. Shuningdek, uchrashuvlar davomida 19 marta o‘z darvozasidan birorta ham gol o‘tkazib yubormagan.
