Ijtimoiy tarmoqlarda kot-d'ivuarlik Vamara Diarrassouba ismli futbolchi 2 kundan buyon Toshkent Xalqaro aeroportida tunayotganligi haqidagi xabarlar tarqaldi. Effect.uz hodimlari kecha tungi soat 00:00 lar atrofida voqeaga oydinlik kiritish maqsadida aeroportga bordi.

Ikki soatdan oshiqroq vaqt mobaynida Vamara qidirildi va yakunda PPX hodimi bilan suhbatdan so‘ng futbolchi uchib ketish zalida ekanligi ma’lum bo‘ldi.

Zalga kirgach, ivuaralik futbolchi yo‘lovchilar uchun ajratilgan maxsus joyning oyoq osti qismida uxlayotganiga guvoh bo‘ldik. Keyinchalik Vamara haqiqattan ham 2 kun aeroportda tunab qolganini o‘zi ham ta’kidlab o‘tdi.

Diarrassoubaning holati hozirda yaxshi va u Toshkentdagi mehmonxonaga joylashtirildi.

Xo‘sh, o‘zi futbolchi nega poytaxtga kelgandi?

Vamara "Buxoro" klubi nomidan Toshkentga chaqirilgan, biroq "Buxoro"ning birorta mutasaddisi uni kutib olmagan, natijada u 2 kun qarovsiz qolgan. Aeroport atrofida ishlaydiganlarning aytishicha, uning yonida puli ham qolmagan va hatto telefon quvvati ham o‘chgan. Xop endi, buxoroliklar nomidan jo‘natilgan hujjatga e’tibor qaratsak, hech ham rasmiy hujjatga o‘xshamaydi.

Unda ko‘plab imloviy xatolar mavjud va eng katta nozoslik "Buxoro" klubi murabbiyi sifatida Muhsin Muhammadiyevning imzosi turibdi. Vaholanki, Muhammadiyev 3 yil avval klubni tark etgan. Bu holatga PFL bosh direktori Diyor Imomxo‘jayev ham reaksiya bildirib o‘tdi.

Eng ayanchli holat esa 17 yoshli futbolchi 5800 dollar atrofidagi summani uni "Buxoro" nomidan taklif etgan firibgarlar hisobiga o‘tkazib bergan. Qolaversa, u o‘z yuklari qayerda ekanligini ham aniq bilmaydi.