Italiya chempionatining 37-turidan o‘rin olgan o‘yinlar 27 may, shanba kuni bo‘lib o‘tdi.

“Inter” o‘zida “Atalanta”ni qabul qildi va 3:2 hisobida g‘alaba qozondi. “Nerazzuri” safida Romelu Lukaku, Nikolo Barella va Lautaro Martineslar o‘z hisobiga gol yozdirib qo‘ydi. Mehmonlar tarkibida Mario Pashalich va Luis Muriyel bittadan gol muallifiga aylanishdi.

Ushbu g‘alaba tufayli "Inter" o‘z ochkolarini 69 taga yetkazdi va jadvalda 2-o‘ringa ko‘tarilgan holda kelasi mavsum uchun Yevropa chempionlar ligasi yo‘llanmasini kafolatladi. "Atalanta"ning mag‘lubiyati tufayli "Lasio" ham YECHL yo‘llanmasini naqd qildi. "Milan" esa qolgan ikki o‘yinda 1 ochko jamg‘armasa ham YECHLda ishtirok etadi.

Bergamoliklar juda katta ehtimol bilan kelasi mavsumda Yevropa ligasida ishtirok etishadi.

A seriya, 37-tur
27 may, shanba
“Inter” – “Atalanta” 3:2
Gollar: 1:0 – 1 Lukaku, 2:0 – 3 Barella, 2:1 – 36 Pashalich, 3:1 – 77 Martines, 3:2 — 90+1 Muriyel
“Inter”: Onana, Dumfris, D’Ambrozio (Darmian, 83), Acherbi, Bastoni (de Vrey, 81), Dimarko (Gozens, 70), Brozovich, Chalhano‘g‘lu, Barella (Aslani, 81), Lukaku (Jeko, 81), Martines.
“Atalanta”: Sportello, Mele (Okoli, 86), Toloi, Jimshiti, Skalvini, Zappakosta, de Ron, Pashalich (Lukman, 61), Kopmeyners, Ederson (Muriel, 69), Heylund.
Ogohlantirish: Toloi (58).