"Manchester Yunayted" "Chelsi" yarim himoyachisi Meyson Mauntning transferi uchun ortiqcha pul to‘lamoqchi emas, deb xabar beradi The Independent. "Qizil iblislar" boshliqlari 24 yoshli futbolchi uchun so‘ralgan 63 million yevroni to‘lamoqchi emas. Mankunianliklar klubi bunday narxni juda yuqori deb hisoblamoqda.
Manbaga ko‘ra, "Manchester Yunayted" bosh murabbiyi Erik ten Xagning transfer byudjeti shu yozda qat’iy cheklanadi. Klub aniq rejasiz katta mablag‘ sarflamaydi.
Maunt joriy mavsum “Chelsi” safida barcha turnirlar doirasida 35 ta o‘yinda maydonga tushib, 3 ta gol va 4 ta golli uzatmaga mualliflik qilgan.
Yarim himoyachining London klubi bilan shartnomasi 2024 yilning iyun oyi oxirigacha amal qiladi. Transfermarkt internet portaliga ko‘ra, futbolchining taxminiy narxi 65 million yevroni tashkil qiladi.
Avvalroq Maunt "Old Trafford"ga o‘tishga tayyorligi haqida xabar berilgandi.