“Barselona” futbol klubining yosh tarbiyalanuvchisi Ansu Fati jamoani tark etishni istamayapti.

Kataloniya radiosi jurnalisti Laia Tudelning xabar berishicha, hujumchi o‘yin amaliyoti kam bo‘lishiga qaramay, "Barselona"da qolib, faoliyatini klubda davom ettirish niyatida ekanligini aniq bildirgan.

20 yoshli hujumchi 2022/23 yilgi mavsumda avvalgidek ko‘p jarohat olmadi, ammo shunga qaramay u asosiy tarkibda ko‘p maydonga tushmadi. Fati joriy mavsumda Kataloniya jamoasi safida 50 ta o‘yinda maydonga tushdi, biroq uning o‘rtacha o‘yin vaqti 36 daqiqani tashkil qildi. Hujumchi 9 ta gol va 4 ta golli uzatmani amalga oshirdi.