O‘zbekiston kubogi “F” guruhi, 3-turidan o‘rin olgan bahsda “Navbahor” safarda “Olimpik” (Toshkent) mehmoni bo‘ladi.

Xabaringiz bor, mamlakatimizning eng sovrindor klublari qatoridan joy olgan va Superliga (oliy liga)mizning muntazam ishtirokchisi bo‘lgan “Navbahor” billur sovrinni 3 marta – 1992, 1995 va 1998 yillarda qo‘lga kiritgan hamda 1993 va 2022 yillarda final ishtirokchisiga aylanib, hal qiluvchi bahslarda “Paxtakor” (0:3, 1993 yili) hamda “Nasaf” (1:2, 2022 yil) jamoalariga imkoniyatni boy bergan.

“Olimpik” esa hali O‘zbekiston kubogi finaliga qadar yetib bormagan.

2021 yilda O‘zbekiston Milliy olimpiya qo‘mitasi (MOQ) va O‘zbekiston Futbol assosiasiyasi (O‘FA) tashabbusi bilan 2024 yili Parijda bo‘lib o‘tadigan yozgi Olimpiada o‘yinlariga puxta hozirlik olib borish maqsadida, olimpiya terma jamoasiga nomzod futbolchilardan  tuzilgan va 2022 yildan Superligada qatnashayotgan, yaqin o‘tmishning mashhur futbolchilaridan biri bo‘lgan Temur Kapadze boshqarayotgan “Olimpik” jamoasi bilan “Navbahor” O‘zbekiston Coca Cola kubogi o‘yinlarida shu paytgacha ikki marta ro‘baro‘ kelgan: 2021 yili guruh bosqichi va 2022 yili 1/8 final bosqichida.

Mazkur bellashuvlarning har ikkisida ham “lochinlar” 1:0 hisobida zafar quchib, keyingi bosqichga yo‘l olishgan, 2021 yili esa 1/8 final yo‘llanmasini  olimpiyachilar ham 2-o‘rin sohibi sifatida qo‘lga kiritishgandi.       

Jamoalarning o‘zaro o‘yinlari:

2021 yil
30.04.2021. “Navbahor” – “Olimpik” – 1:0 (1:0)
Gol: Mirzohid G‘ofurov (29).  

2022 yil
23.08.2022. “Olimpik” – “Navbahor” – 0:1 (0:1)
Gol: Jamshid Boltaboyev (20).

Eslatib o‘tamiz, “Olimpik” – “Navbahor” uchrashuvi 2 iyul kuni Toshkentdagi “Jar” stadionida soat 20:00 da start oladi.

“Navbahor” PFK matbuot xizmati.