Xabaringiz bor, joriy yilning 11 - 20 iyun kunlari Toshkent shahrida “CAFA Nation's Cup”  xalqaro musobaqasi bo‘lib o‘tadi. Mintaqamizning nufuzli musobaqasini yuqori saviyada o‘tkazish maqsadida O‘zbekiston futbol assosiasiyasi tomonidan sa’y-harakat davom ettirilmoqda. Xususan, O‘FA ishchi guruhi tomonidan turnir o‘tkaziladigan stadionlar, mehmonxonalar va mashg‘ulot maydonlari shay holatga keltirilgan.

Musobaqa o‘tkazishga mas’ul bo‘lgan Markaziy Osiyo futbol konfederasiyasi delegasiyasi mamlakatimizga yetib keldi. Bugun O‘zbekiston futbol assosiasiyasida SAFA va O‘FA vakillari ishtirokida turnirga tayyorgarlik ishlariga bag‘ishlangan uchrashuv bo‘lib o‘tdi. Dastlab SAFA vakillari O‘zbekistonning mazkur yirik turnirni tashkil etish tashabbusi uchun minnatdorchilik bildirdilar.

Yig‘ilishda musobaqaning tashkiliy jarayonlari, hususan, tashrif buyuradigan delegasiya va mehmonlarni munosib kutib olish, ularga barcha sharoitlarni taqdim etish, mehmonxonalardagi qulayliklar, stadionlar va mashg‘ulot maydonlari sifatini ta’minlash masalalari muhokama qilindi. Musobaqa ishtirokchilari hamda mehmonlarning xavfsizligini ta’minlashga alohida e’tibor qaratildi. Stadionlarda fuqarolar va transport harakatini tartibga solish borasidagi rejalar muvofiqlashtirildi. Matbuot va media vakillariga barcha sharoitlarni yaratish zarurligi ta’kidlandi.

Barcha yo‘nalishlar bo‘yicha mutaxassislarning takliflari o‘rganib chiqildi va mas’ullarga tegishli ko‘rsatmalar berildi.

Eslatib o‘tamiz, musobaqa ishtirokchisi bo‘lgan O‘zbekiston milliy terma jamoasi guruh bosqichidagi dastlabki bahsini 11 iyun kuni Ummonga qarshi o‘tkazadi. Uchrashuv «Bunyodkor» stadionida bo‘lib o‘tadi