O‘zbekiston terma jamoasi bosh murabbiyi Vlado Radmanovich ertaga, 20 iyun kuni bo‘lib o‘tadigan CAFA Nation's Cup finali doirasidagi Eronga qarshi o‘yin oldilan fikrlari bilan o‘rtoqlashdi.

"Barchaga assalomu alaykum. Ertangi finalda o‘ynash uchun ikkala jamoa ham loyiq edi. Eronning bizdan bir ustunlik jihati bor edi. Ular bizga nisbatan oson guruhdan o‘rin oldi va bitta kamroq o‘yin o‘tkazishdi. Ularda tiklanish uchun ko‘proq vaqt bo‘lganini aytib o‘tish lozim. Ularni juda hurmat qilamiz. Ammo bizda hech kim qo‘rqayotgani yo‘q. Ikkala jamoada ham hujum juda kuchli, ertaga qiziqarli o‘yin guvohiga aylanamiz.

Ertaga bizning futbolchilarmiz maydonning har bir qismi uchun kurashib, tartibli harakat qilishi lozim. Ertaga butun o‘yin davomida yuqori tempda harakat qilishga urinamiz.

Eronning barcha o‘yinlarini tahlil qilib chiqdik. Ular haqida barcha ma’lumotga egamiz. Ertaga ulardan hujumkor o‘yin kutyapmiz. Eronliklarda hujum chizig‘i va yarim himoya juda yaxshi shakllanganini aytib o‘tishimiz kerak.

Futbol - taxmin qilish qiyin bo‘lgan sport turi. Bu sport turida juda mayda detallar ham o‘yin taqdiriga ta’sir ko‘rsatishi mumkin. Shu sababdan, ertaga qo‘limizdan kelgan barcha ishni qilamiz. Umid qilamizki, omad ham biz tarafda bo‘ladi.

Hozirda Katanesning ahvoli yaxshi. U kundan-kunga tuzalib bormoqda. Afsuski, ertaga biz bilan bo‘lmaydi. U jamoaga omad tiladi.

Qaytaraman, o‘yinda muvaffaqiyat qozonishni istasak, maydonning har bir yeri uchun kurashib, tartibli o‘yin ko‘rsatishimiz kerak. Eron haqida juda ko‘p ma’lumotga egamiz va ularga qarshi qanday o‘ynash kerakligini bilamiz.

Ertaga qanday taktikada o‘ynashimiz borasida bugun kechqurun yoki ertaga ertalab bir qarorga kelamiz.

Jismoniy tayyorgarligimiz yaxshilanib bormoqda. Bu borada murabbiylar ishlamoqda. Ammo, afsuski, futbolchilar asosiy vaqtini o‘z jamoasida o‘tkazadi. Bu yerdagi 1 yoki 2 haftalik yig‘inda nimanidir o‘zgartirish qiyin bo‘ladi", - dedi Radmanovich.