UEFA o‘zining rasmiy saytida Germaniyada bo‘lib o‘tadigan futbol bo‘yicha 2024 yilgi Yevropa chempionatining rasmiy maskotini taqdim etdi. Ular ayiqcha ko‘rinishida bo‘ladi.
Maskot birinchi marta Gelzenkirxendagi boshlang‘ich maktablardan birida joriy etilgan.
“Maskot 20 asr boshlarida Germaniyada paydo bo‘lganligi aytilgan mashhur bolalar o‘yinchog‘i ayiqchaga ehtirom ko‘rsatadi”, — deyiladi UEFA bayonotida.
Kelgusi ikki hafta ichida UEFA veb-saytidagi muxlislar yangi maskot nomiga ovoz berishlari mumkin bo‘ladi. To‘rtta variant ham nemischa "ayiq" ma’nosini anglatuvchi Bär so‘zidan ilhomlangan: Albär, Bärnardo, Bärnheart va Grezi von Bär.
Yevro-2024 Germaniyaning 10 ta shahrida 2024 yilning 14 iyunidan 14 iyuliga qadar bo‘lib o‘tadi. Turnirning guruh bosqichida 24 ta jamoa ishtirok etadi.
