«Napoli» fanatlar guruhi (ultras) o‘z va’dasi ustidan chiqdi: jamoani skudetto sari yetaklagan bosh murabbiy Luchano Spallettiga vaqtida o‘g‘irlab ketilgan avtomobili rulini qaytardi.

Xayrlashuv oldidan chinakam «syurpriz». Aytish joiz, o‘g‘irlangan Fiat Panda tarixi naq 2 yilga cho‘zildi.

Takror aytish kerak, «Napoli» yakunlangan mavsum Spalletti boshqaruvida 33 yillik tanaffusdan keyin yana «A» seriya chempionligini qo‘lga kiritdi. Neapol oxirgi marta klub safida afsonaviy Diyego Maradona o‘ynagan vaqt skudetto sohibiga aylangan edi. Qarangki, Luchano katta va uzoq kutilgan zafarga qaramay, ijodiy ta’til olishni lozim topdi va Neapol klubi bosh murabbiyi vakolatini topshirdi. Bunga klub prezidenti va rahbariyati bilan kelishmovchiliklar sabab ekanligi aytilmoqda.

E’tiborni tortadigan tomoni, «Napoli» muxlislari Spallettidan ancha oldin - 2021 yilning oktyabr oyida iste’fo talab qilishgandi. Tiffozilar guruhi o‘sha vaqt murabbiy ishidan shunchalik norozi bo‘ldiki, hattoki, unga tegishli Fiat Panda avtomobilini o‘g‘irlab ketdi va o‘rtaga dangal shart qo‘ydi: «Spalletti, avtomobilingni qaytarib berishga tayyormiz, faqat buning uchun klubdan ketishing kerak!» Mana, Luchano taqdir taqozosiga ko‘ra, chempionlik marrasini zabt etgan holda ketmoqda. O‘z navbatida, ultras va’dasini qisman bajardi: murabbiyga «yo‘q bo‘lib ketgan» avtomobil ruli qaytarildi. Shuningdek, Luchanoning sevimli xonandasi Pino Daniele qo‘shiqlari yozilgan bir necha disklar ham.

Darvoqe, Spalletti hozir ham asosan Fiat Panda mashinasidan foydalanadi. Yaqinda ushbu «toychoq» «Napoli» chempionligi sharafiga alohida bo‘yaldi-bezatildi.