"Al-Ittihod"ning yangi a’zosi Ngolo Kante Londonning "Chelsi" klubi bilan xayrlashdi. "Ko‘klar" tarkibida mashhur fransuz o‘z faoliyatining so‘nggi yetti yilini o‘tkazdi.
“Xayr, “Chelsi”, faoliyatimning yangi sahifasini ochish vaqti keldi. Lekin bundan oldin butun katta “Chelsi” oilasiga rahmat aytishim muhim. Muxlislar, futbolchilar, menejerlar, tibbiyot xodimlari, ushbu afsonaviy klubda ushbu yillar mavsum davomida men bilan birga bo‘lgan barchaga. Siz bilan birga qo‘lga kiritilgan g‘alabalar va unvonlar haqida ko‘p xotiralarim bor. Men sizga chin qalbimdan minnatdorchilik bildiraman", deb yozdi Kante ijtimoiy tarmoqdagi sahifasida.
Eslatib o‘tamiz, Kantening "Chelsi"dagi o‘tgan mavsumi omadsiz chiqdi. U klub safida bor yo‘g‘i 9ta rasmiy uchrashuvda maydonga tushib, bitta golli uzatmani amalga oshirdi.
