Yevropa futbol uyushmalari ittifoqi (UEFA) Superkubok uchun o‘yin formatini o‘zgartirdi.
Yangi reglamentga ko‘ra, asosiy vaqt yakunida durang qayd etilgan taqdirda, jamoalar g‘olibni aniqlash uchun to‘g‘ridan-to‘g‘ri penaltilar seriyasini amalga oshiradi. 15 daqiqalik ikkita qo‘shimcha taymdan iborat format bekor qilindi.
Chempionlar ligasi g‘olibi "Manchester Siti" va Yevropa ligasi chempioni "Sevilya" 2023 yilgi UYEFA Superkubogi bahsida to‘qnash kelishadi. O‘yin 16 avgust kuni Afinada bo‘lib o‘tadi.
UEFA Superkubogi 1972 yilda tashkil etilgan. Eng ko‘p kubokni "Barselona", "Real Madrid" va "Milan" (har biri 5 tadan) qo‘lga kiritgan. Superkubokning amaldagi sohibi 2022 yilda Frankfurtning “Ayntraxt” klubini mag‘lub etgan (2:0) Madrid klubi hisoblanadi.