“Andijon” jamoasining “Paxtakor”ga qarshi uchrashuvini 22-daqiqasida gruziyalik legioner Nodari Kavtaradze kutilmaganda jarohat olib, maydonni majburiy ravishda tark etdi. Holbuki, u uchrashuvni juda yaxshi boshlagandi.

88-raqam ostida o‘ynayotgan Kavtaradze “Andijon” matbuot xizmatiga o‘z fikrlari bilan o‘rtoqlashdi.

“Birinchi navbatda omadli seriyamiz davom etayotganini aytib o‘tmog‘im kerak. O‘ylaymanki, safarda “Paxtakor” bilan durang o‘ynash bu yaxshi natija. Barcha yigitlar maksimum darajada kuch sarfladilar. Natija haqqoniy. Biz birinchi davrani juda yaxshi notada tamomladik va men “Andijon” klubiga kim daxldor bo‘lsa, hammasini bu bilan tabriklab qolaman.

Shuningdek, muxlislarimizga alohida minnatdorlik bildirishni istagan bo‘lardim. Shaxsan o‘zimga kelsak, birinchi davrani yaxshi notada, ayniqsa, “Paxtakor”ga qarshi bellashuvda zo‘r o‘yin ko‘rsatgan holda tamomlashni niyat qilgandim. Uchrashuvdan oldin butun murabbiylar shtabi vakillari va yigitlar “Paxtakor”ga qarshi uchrashuvda yaxshi natijaga erisha olishimizga ishongandik. Amalda ham shunday bo‘ldi. Baxtga qarshi yo‘nalishni o‘zgartirayotgan paytimda tizzam jarohatlandi va o‘zimni yomon his qilganim bois uchrashuvni davom ettira olmadim”, - deydi Nodari.

Birinchi davra tugagach, uyiga qaytgan Kavtaradze endi jarohatini davolaydi va biz unga tezroq sog‘ayib safga qaytishini tilab qolamiz.