6 iyul Farg‘onadagi “Istiqlol” o‘yingohida “Neftchi” futbolchilari, Rossiya Premyer-ligasi vakili, Yekaterinburgning “Ural” jamoasiga qarshi xalqaro o‘rtoqlik uchrashuvida maydonga tushishadi. 13 iyul kuni farg‘onaliklar “Ekaterinburg Arena”da bo‘lib o‘tadigan javob o‘yini uchun Sverdlovsk viloyatiga borishadi.
Rossiya Premyer-ligasining kuchli jamoalaridan biri bo‘lgan “Ural”, Farg‘onaga asosiy tarkib bilan tashrif buyuradi. Erik Bikfalvi, Kristian Neyva, Silviye Begich, Daniel Mishkich, Vladis-Emmerson kabi taniqli o‘yinchilar farg‘onalik muxlislar qarshisida to‘p tepadi.
Farg‘ona va Sverdlovsk viloyatlari bosh jamoalarining o‘zaro o‘rtoqlik uchrashuvlari, Sverdlovsk viloyati gubernatori Yevgeniy Kuyvashev boshchiligidagi delegasiyaning joriy yil aprel oyida Farg‘ona viloyatiga tashrifi davomida viloyat hokimi Xayrullo Bozorov bilan o‘tkazilgan muzokaralarda erishilgan kelishuv doirasida o‘tkazilmoqda.
