“Metallurg”ni mavsum boshidan buyon ikki nafar bosh murabbiy boshqardi. Ispaniyalik Luisma Ernandes  3-turdan (+1=0-2, 1:6) keyin iste’foga chiqarildi. 4-turdagi “Paxtakor”ga qarshi uchrashuvda (+0=0-1, 1:3) jamoani katta murabbiy Ilyos Qurbonov maydonga olib tushdi. 5-turdan esa “Metallurg” boshqaruvi chernogoriyalik Vesko Steshevich qo‘liga o‘tdi (+2=3-4, 9:14).

Murabbiylar shtabi 13 ta o‘yinda 24 nafar futbolchi xizmatidan foydalanishdi. Birinchi davraning barcha 13 ta uchrashuvlarida maydonga tushgan o‘yinchilar soni 4 nafar. Lekin ularning barchasi maydonda to‘liq qolishmagan. Eng ko‘p daqiqa o‘ynagan futbolchi esa Shahzodbek G‘ofurbekov – 1126 daqiqa. Ming daqiqalik dovondan shuningdek, Zabixillo O‘rinboyev hamda 12 ta o‘yinda maydonga tushgan Abrorbek Toshqo‘ziyevlar ham oshib o‘tishdi. 10 ta va undan ko‘p o‘yinlarda maydonga tushgan futbolchilarimiz soni esa 9 nafar.

“Metallurg” birinchi davrada raqiblar darvozasiga 11 ta gol urgan. Jamoa to‘purari Zabihillo O‘rinboyev – 3 ta gol. O‘zbekiston U-20 terma jamoasi a’zosi, Osiyo chempioni Shahzodjon Ne’matjonov hisobida 2 ta gol bor. O‘zbekiston Olimpiya terma jamoasi a’zosi Ibrohim Ibragimov ham o‘z hisobiga 2 ta gol yozdirib qo‘ygan. Shahzodbek G‘ofurbekov hamda Ergash Ismoilovlar o‘yindan, Husniddin G‘ofurov hamda Damir Temirovlar esa penaltidan bir martadan muvaffaqiyat qozonishgan.

Murabbiylar 13 ta uchrashuv qaydnomasiga 4 nafar darvozabonni kiritgan bo‘lsa-da, ulardan 2 nafari darvozani qo‘riqladi: Akmal Ortiqov – 8 ta o‘yin maydonga tushib, ulardan 2 tasida darvozasi daxlsizligini saqlab qoldi (+3=2-3, 9:15). Aleksandr Lobanov esa 5 ta o‘yinda darvozani qo‘riqladi (+0=1-4, 2:8).

Eng ko‘p ogohlantirilgan futbolchi Abrorbek Toshqo‘ziyev bo‘ldi – 5 ta sariq kartochka. Shuningdek, Kerim Palich ham ogohlantirishlar (4 ta sariq kartochka) sabab bitta o‘yinni o‘tkazib yubordi. Hakamlar “Metallurg”ning jami 14 nafar o‘yinchisini “jazolagan” (30 ta sariq kartochka). 4 nafar futbolchimiz maydondan chetlatilgan.