Saudiya Arabistoni futbol dunyosini larzaga solib, hammani hayron qoldirmoqda. Moliyaviy ustunlik arablarga Karim Benzema, N'Golo Kante va Xakim Ziyesh kabi mega-yulduzlarni olib kelish imkonini berdi. Hammasi Krishtianu Ronalduning 2023 yil avvalidagi yirik shartnomasidan keyin boshlangandi. Hozir O‘rta Sharq Yevropaning har-xil yoshdagi futbolchilarini o‘z bag‘riga chorlamoqda. Quyida Saudiya Pro-ligasidagi eng yaxshi maoshga ega futbolchilar haqida so‘z bordi.
10. Ever Banega – 9.1 million funt
35 yoshli Banega 2020 yilda "Sevilya" bilan Yevropa ligasida zafar quchadi. Titul qo‘lga kiritilgach, futbolchi "Al-SHabab"ga yo‘l oladi. O‘sha paytda uning yiliga 9 millionlik shartnomasi o‘ta kattadek tuyulgandi. Shundan keyin yangi-yangi yulduzlar olib kelindi. Baneganing maoshi esa ularniki oldida hech nima bo‘lmay qoldi.
9. Eduar Mendi – 9.4 million funt
"Chelsi"ni tark etgan Mendi hali Yevropada qolsa bo‘lardi. Uning yoshi bunga bemalol imkon beradi. Ammo senegallik futbolchi "Al-Ahli"ga o‘tishni ma’qul ko‘rdi. Mendi Londonda 3 yil faoliyat yuritgandi. Uning transferi "Chelsi"ga 17 million funt foyda keltirdi.
8. Jota – 10 million funt
"Seltik" muxlislarini qayg‘uga solgan holda, portugaliyalik futbolchi "Al-Ittihod"ga yo‘l oldi. Hozir Jota Benzema va Kante bilan bir jamoaga keldi. 25 millionga sotib olingan hujumchi yiliga 10 million funt oladi.
7. Ruben Nevesh – 15.6 million funt
Neveshni ko‘pchilik Yevropada qoladi deb o‘yladi. 25 yoshli yarim himoyachi APLdan boshqa kuchli ligaga ko‘chishi yoki Angliyaning o‘zidagi yevrokuboklar uchun kurashayotgan jamoaga o‘tishi mumkin edi. Ammo bunday bo‘lmadi. Nevesh YECHLda o‘ynashni istar edi. "Al-Hilol" uni "Vulvz"dan 47 million funtga sotib oldi. Ruben Saudiya Arabistonida haftasiga 300 ming funt bilan ta’minlanadi.
6. Roberto Firmino – 17 million funt
Firmino erkin agent sifatida o‘zi sakkiz yil birga bo‘lgan "Liverpul"ni tark etdi. Braziliyalik ham Yevropa jamoalari uchun mos darajaga hali ega edi. Afsuski, hujumchi "Al-Ahli" bilan uch yillik shartnoma tuzdi. Endilikda Firmino "Chelsi"dan kelgan Mendi jamoadoshiga aylandi.
5. Marselo Brozovich – 21 million funt
"Al-Nasr" yangi yarim himoyachiga ega bo‘ldi. Xorvatiya terma jamoasi a’zosi ham unchalik qari emasdi. Shunga qaramay, katta pul Brozovichning fikri o‘zgarishiga sababchi bo‘ldi. Yarim himoyachi endi Pro-ligada uch yil to‘p tepadi.
4. Kalidu Kulibali – 30 million funt
Kulibali bundan 12 oy ilgari 34 million funtga xarid qilingan edi. Himoyachi ketishi bilan "Napoli" chempionlikka erishdi. "Chelsi" ortiqcha futbolchilarni sotmoqda. Shu sababli ziyoniga bo‘lsa ham, Kulibalini 20 million funtga pulladi. "Al-Hilol" endi senegallika yiliga 30 million to‘laydi.
3. N'Golo Kante – 86.2 million funt
Kuchli uchlik oldida yuqoridagi summalar hech nima bo‘lmay qoladi. N'Golo Kanteni "Chelsi" jon-jahdi bilan olib qolishga intildi. Ammo buning iloji bo‘lmadi. Negaki, Fransiya terma jamoasi a’zosi uchun "Al-Ittihod" yirik taklif bilan keldi. Buni rad etib bo‘lmasdi. 32 yoshli qahramonimiz Jidda shahrida 3 yillik shartnomaga hech ikkilanmay imzo chekdi.
2. Karim Benzema – 172 million funt
"Oltin to‘p" sohibiga yarashaveradi. Uning Yevropadagi davri yaxshi vaqtda yakuniga yetdi. Benzema yana bir yil "Real"da qolsa bo‘lardi. Ammo u Saudiyaga safarni tanladi. "Al-Ittihod" Benzema uchun uch yil 172 milliondan maosh to‘laydigan bo‘ldi.
1. Krishtianu Ronaldu – 173 million funt
Benzema maosh borasida Ronalduga o‘ta yaqin keldi. Shunga qaramay, fransiyalik hujumchi Ronaldu kabi 2 yil emas, balki 3 yil O‘rta Sharqda bo‘ladi. Bu degani u Ronaldudan ko‘proq maosh oladi. Shuni ta’kidlash kerakki, agarda Ronaldu yilni boshida bu trendni boshlab bermaganida, balki katta yulduzlar Osiyo o‘lkasiga kelmasdi. Krishtianu "MYU" bilan xayr-xo‘shni nasiya qilib, yilning boshida "Al-Nasr" bilan ikki yillik bitimga imzo chekkandi.
ISMATOV J.
