Sadio Mane bugun Afrika futbolining eng sara yulduzlaridan biri, albatta.
Senegallik hujumchining hozirgi darajaga chiqish yo‘lida murakkab dovonlardan oshib o‘tgani ham ko‘pchilikka ma’lum. Deylik, Sadio 2010-2012 yillar oralig‘ida Fransiyaning «Mes» klubida tajriba oshirdi, shundan so‘ng Avstriyaga yo‘l olib, «RB Zalsburg» safiga qo‘shildi. Senegal faxri shundan so‘ng navbati bilan «Sautgempton» va «Liverpul» safida to‘p surib, Angliya futbolini mahv etdi. Ayniqsa, «qizillar» bilan cho‘qqilarga chiqdi, «Enfild»da o‘ta samarali faoliyat olib bordi. Mana, u hozir «Bavariya» a’zosi va butun Afrika futboli g‘ururi...
Qisqasi, Sadio Manening yevrofutboldagi yurishi ko‘pchilikka ma’lum. Lekin boshlanish chizig‘i-chi? Tabiiyki, senegallik yosh yigitcha Fransiyada birdan tanilib qolmagan. Umuman, Sadioning faoliyat yo‘li haqida kun kelib, alohida film suratga olinsa, ajabmas. Har holda, bu - ssenariynavislar uchun tayyor «mahsulot». Yaxshisi, Sadio Manening quyidagi hikoyasini o‘qib chiqing va o‘zingiz xulosa chiqaring:
- «Mes» klubi bilan shartnoma tuzish uchun Fransiyaga kelgach, birinchi kunda qanday holatga tushganimni yaxshi eslayman. Tibbiy ko‘rikdan so‘ng darhol klub mashg‘ulotlariga qo‘shilishni xohladim, biroq murabbiy bunga qarshi chiqib, ozgina hordiq chiqarishim zarurligini ta’kidladi. O‘sha vaqt telefonim kartasida pul qolmagandi. Lekin onamga qo‘ng‘iroq qilib, Fransiyada ekanligimni aytib qo‘yishim zarur edi. Ertasiga Mesda uzoq vaqtdan buyon yashayotgan do‘stlarim davrasida sayrga chiqdim, xayriyatki, ularning yordamlari bilan onamga qo‘ng‘iroq qildim, mendan xavotir olmasligini aytdim. Onam esa Fransiyada ekanligimga ishonmadi. Muloqotimiz tig‘iz ohangda davom etgani ham esimda:
- Onajon, bu yer Fransiya, Yevropa...
- Hoy bola, Yevropa deganing nimasi? Sen Senegalda yashaysan, shu yerda bo‘lishing kerak...
Onam bilan bahslashmadim va faqat hozir Yevropada bo‘lishim shartligini tushuntirishga urindim. U esa hayratda qolgandi va meni ahmoqqa ham chiqardi. Onam shu qadar hayron bo‘ldiki, gaplarim rost yoki yolg‘onligini aniqlash uchun har kuni menga qayta-qayta qo‘ng‘iroq qildi. Buning uchun qayerdan pul topganini esa bilmayman. Har holda, o‘sha vaqt Senegalda xalqaro so‘zlashuvlar tarifi juda baland edi. Qisqasi, onam menga aslo ishonmadi anchagacha. Keyin bir kuni unga qo‘ng‘iroq qilib, televizorni yoqishi va unda meni ko‘rishini aytdim. Shu tariqa o‘yinimni tomosha qilganidan keyingina nihoyat, Fransiyada ekanligimga ishondi va orzum amalga oshayotganini tushundi.
Xo‘sh, aytingchi, shu tarixning o‘zi sahnalashtirishga arzimaydimi? Ha, Sadioning ilk qadamlari afrikalik futbolchilar yevrofutbolda osongina joy topmasliklaridan dalolat. Boshqacha aytganda, har qanday muvaffaqiyat boshida ma’lum darajada qurbonliklar talab etadi, oldingizga qiyin dovonlar qo‘yadi.
Ravshan IBROHIM tayyorladi
