“Navbahor”ning birinchi davraga oid statistik ma’lumotlari bilan tanishtirishda davom etamiz. Bu safar futbolchilarning kartochkalari statistikasiga to‘xtalishni lozim deb topdik.

Albatta, futbol jamoaviy sport turi sanalsada, yakkakurashlarga ham boydir. To‘p uchun kurashdagi bunday vaziyatlar esa odatda qo‘polliklarsiz o‘tmaydi.

Shuningdek, ayrim paytlarda raqib hujumini bartaraf etish, bundan tashqari, asabni jilovlay olmaslik, qiziqqonlik ham futbolchilarning hakam tomonidan ogohlantirish olishlari, ayrim paytlarda esa hattoki, maydondan chetlatishlariga sabab bo‘ladi. Qisqasi, kartochkalar millionlar o‘yinining bir bo‘lagi hisoblanadi.    

Superligasining 1-davrasida “lochinlar”ning 13 nafar futbolchisi hakamlar tomonidan sariq va qizil kartochkalar bilan “siylandi”.

Jamoaning 30 yoshli tajribali himoyachisi, maydondagi haqiqiy jangchi Davronbek Hoshimov 4 ta sariq va bitta qizil kartochka olgan holda, diskvalifikasiya sababli, “lochinlar” ishtirokidagi ancha o‘yinlarni o‘tkazib yuborishiga to‘g‘ri keldi.

“Navbahor”ning serbiyalik 30 yoshli tajribali yarim himoyachisi Yovan Jokich esa 5 marta ogohlantirilib, diskvalifikasiya bois, bitta o‘yinni o‘tkazib yubordi.

Jamoaning 26 yoshli yarim himoyachisi Jamshid Boltaboyev esa 3 ta sariq, 1 ta qizil kartochka bilan “siylandi” hamda u ham qizil kartochka sababli, “Navbahor”ning ayrim o‘yinlarida jamoadoshlariga yordam bera olmadi.

"Navbahor" a’zolarining 1-davradagi kartochkalar bo‘yicha statiskasi esa quyidagicha:   

Davronbek Hoshimov  – 4 ta sariq, 1 ta qizil kartochka;
Yovan Jokich – 5 ta sariq kartochka;
Jamshid Boltaboyev – 3 ta sariq kartochka, 1 ta qizil kartochka;  
Igor Golban – 3 ta sariq kartochka;
Asadbek Sobirjonov, Luka Chermel, Abrorbek Ismoilov – 2 tadan sariq kartochka;
Jasurbek Yaxshiboyev, Oston O‘runov, Ibrohim Yo‘ldoshev, Shahboz Jo‘rabekov, Jamshid Iskanderov, Temurxo‘ja Abduxoliqov – 1 tadan sariq kartochka.

“Navbahor” PFK matbuot xizmati.