“Навбаҳор”нинг биринчи даврага оид статистик маълумотлари билан таништиришда давом этамиз. Бу сафар футболчиларнинг карточкалари статистикасига тўхталишни лозим деб топдик.

Албатта, футбол жамоавий спорт тури саналсада, яккакурашларга ҳам бойдир. Тўп учун курашдаги бундай вазиятлар эса одатда қўполликларсиз ўтмайди.

Шунингдек, айрим пайтларда рақиб ҳужумини бартараф этиш, бундан ташқари, асабни жиловлай олмаслик, қизиққонлик ҳам футболчиларнинг ҳакам томонидан огоҳлантириш олишлари, айрим пайтларда эса ҳаттоки, майдондан четлатишларига сабаб бўлади. Қисқаси, карточкалар миллионлар ўйинининг бир бўлаги ҳисобланади.    

Суперлигасининг 1-даврасида “лочинлар”нинг 13 нафар футболчиси ҳакамлар томонидан сариқ ва қизил карточкалар билан “сийланди”.

Жамоанинг 30 ёшли тажрибали ҳимоячиси, майдондаги ҳақиқий жангчи Давронбек Ҳошимов 4 та сариқ ва битта қизил карточка олган ҳолда, дисквалификация сабабли, “лочинлар” иштирокидаги анча ўйинларни ўтказиб юборишига тўғри келди.

“Навбаҳор”нинг сербиялик 30 ёшли тажрибали ярим ҳимоячиси Йован Жокич эса 5 марта огоҳлантирилиб, дисквалификация боис, битта ўйинни ўтказиб юборди.

Жамоанинг 26 ёшли ярим ҳимоячиси Жамшид Болтабоев эса 3 та сариқ, 1 та қизил карточка билан “сийланди” ҳамда у ҳам қизил карточка сабабли, “Навбаҳор”нинг айрим ўйинларида жамоадошларига ёрдам бера олмади.

"Навбаҳор" аъзоларининг 1-даврадаги карточкалар бўйича статискаси эса қуйидагича:   

Давронбек Ҳошимов  – 4 та сариқ, 1 та қизил карточка;
Йован Жокич – 5 та сариқ карточка;
Жамшид Болтабоев – 3 та сариқ карточка, 1 та қизил карточка;  
Игорь Голбан – 3 та сариқ карточка;
Асадбек Собиржонов, Лука Чермель, Аброрбек Исмоилов – 2 тадан сариқ карточка;
Жасурбек Яхшибоев, Остон Ўрунов, Иброҳим Йўлдошев, Шаҳбоз Жўрабеков, Жамшид Искандеров, Темурхўжа Абдухолиқов – 1 тадан сариқ карточка.

“Навбаҳор” ПФК матбуот хизмати.