"Chelsi" hujumchisi Romelu Lukaku o‘tgan mavsumni ijara asosida o‘tkazgan "Inter"ga qaytish uchun maoshini sezilarli darajada kamaytirishga tayyor. Bu haqda The Telegraph nashri xabar bermoqda.
Manbaga ko‘ra, Lukaku "Inter"da o‘ynashni davom ettirish uchun yiliga deyarli 1 million funt (taxminan 1,2 million yevro) maoshini kamaytirishga tayyor. Qayd etilishicha, 30 yoshli belgiyalik futbolchini “Yuventus”ga o‘tish varianti qiziqmayapti, unga qiziqish haqida avvalroq xabar berilgan edi.
"Inter" yaqin orada "Chelsi"ga turli bonuslarni hisobga olgan holda Lukakuni 40 million yevroga sotib olish bo‘yicha yangi taklif bilan chiqishi kutilmoqda.
O‘tgan mavsumda Lukaku “Inter” safida 37 ta o‘yinda maydonga tushib, 14 ta gol urdi va 7 ta golli uzatmani amalga oshirdi. Transfermarkt Belgiya terma jamoasi futbolchisini 40 million yevroga baholamoqda.
