Krishtianu Ronaldu "Portu" yarim himoyachisi Otavioni "An-Nasr"ga o‘tishga ishontirdi.

Avvalroq, Ronaldu to‘p tepayotgan Saudiya klubi Otavio uchun 40 million yevrodan kam pul taklif qilgani, "Portu" esa 60 million yevro talab qilayotgani xabar qilingandi.

A Bola xabariga ko‘ra, riyodliklar Otavioga soliqlar to‘langanidan keyin yiliga 13,5 million yevro taklif qilishga tayyor. Turli bonuslarni hisobga olsak, bu summa yiliga 15 million yevrogacha ko‘tarilishi mumkin - bu "Portu"dagi futbolchining maoshidan besh baravar ko‘p. 28 yoshli yarim himoyachi taklifni qabul qilishga intilmoqda.

Ronaldu ham terma jamoadoshini “An-Nasr”ga o‘tkazishga qiziqmoqda. Portugaliya sardori Otavioni Saudiya klubiga o‘tishga ko‘ndirish uchun qo‘ng‘iroq qildi.

Qayd etilishicha, bonuslar va hamjihatlik to‘lovlarini hisobga olgan holda "Portu" Otavioni hozir sotsa, bor-yo‘g‘i 27 million yevro oladi, chunki 15 iyulga qadar uning shartnomasi bo‘yicha 40 million yevrolik tovon puli bor. Bu sanadan keyin summa 60 millionga ko‘tariladi, biroq "An-Nasr" imkon qadar tezroq shartnomani yopishni istaydi.

O‘tgan mavsumda Otavio chempionatning 27ta uchrashuvida 5ta gol urdi va 7ta golli uzatmani amalga oshirdi.