"Yuventus" hujumchisi Dushan Vlaxovich "PSJ"ga o‘tishga rozi bo‘ldi.

Serbiyalik futbolchi so‘nggi paytlarda Parij klubining asosiy nishonlaridan biriga aylangan.

Footmercato xabariga ko‘ra, 23 yoshli futbolchining vakillari bilan olib borilgan muzokaralar muvaffaqiyatli yakunlangan: Vlaxovich Liga 1 giganti bilan bonuslarni hisobga olmaganda yiliga 11 million yevro maoshli besh yillik shartnoma borasida kelishib oldi.

Transfer amalga oshishi uchun "PSJ" "Yuventus" bilan muzokara olib borishi kerak. "Keksa sinyora" hujumchi uchun taxminan 80 million yevro so‘ramoqda.

Dushan Vlaxovich 2022 yilning yanvaridan beri "Yuventus"da to‘p tepadi. Turinliklar safida 63 ta o‘yinda maydonga tushib, 23 ta gol va 6 ta golli uzatmaga mualliflik qilgan.