"Yuventus" yarim himoyachisi Artur Melo "Fiorentina"ga o‘tishga tayyorlanmoqda.
Avval xabar qilinganidek, 26 yoshli futbolchi "binafsharanglilar" lageriga ijara asosida qo‘shilish arafasida turibdi. Jurnalist Jovanni Albanezening so‘zlariga ko‘ra, kelishuv seshanba kuni yopilishi mumkin, biroq tomonlar hali ham ba’zi tafsilotlarni hal qilishi kerak. "Yuventus" Artur ijarada bo‘lgan vaqtida uning maoshining yarmidan ko‘pini to‘lashi kutilmoqda. Braziliyalik futbolchini "Fiorentina" sotib olish huquqiga ham ega bo‘ladi.
Artur Melo 2020 yildan beri "Yuventus"ga tegishli. O‘tgan mavsumda u "Liverpul"ga ijaraga berilgan va mersisaydliklar safida bor yo‘g‘i 1 ta o‘yin o‘tkazgan.
