Sobiq "Barselona" yulduzi Lionel Messi 2015 yilda 5 ta o‘smirning nomini aytib, ularni kelajakning eng yorqin yulduzlaridan bo‘lishini bashorat qiladi. Tasavvur qiling, o‘sha tanlangan futbolchilardan birisiz. Jimgina futbol o‘ynab yurasiz va to‘satdan, tarixdagi eng yaxshi futbolchilardan biri sizni kelajak yulduzi sifatida ko‘rayotganini aytadi. Bunday hodisa istalgan futbolchiga sharaf. Messining fikri bir tomondan motivasion sabab bo‘lsa, boshqa tomondan katta bosim ham yuklaydi. Quyida Messi taxmin qilgan o‘sha "kelajak yulduzlari" va ularning taqdiri ne kechganini bilib olasiz.
Kenedi
Kenedi "Fluminense" klubida porlaydi. Shu sabab 2015 yilda "Chelsi" uni sotib oladi. Vinger debyut mavsumida London klubi safida 20 marta maydonga tushiriladi. Afsuski, shundan keyin hammasi o‘zgarib ketdi. Kenedi uzoq vaqt "Uotford", "Nyukasl", "Xetafe" va "Granada" kabi klublarda ijarada yurdi. 2021 yilda braziliyalik futbolchi "Chelsi" bilan yangi bitim tuzadi. 2022 yilning iyunida Kenedi "Real Valyodolid"ga doimiy shartnoma bilan yo‘l oladi. O‘tgan mavsumda hujumchi jami 12 ta bahsda maydonga tushirilgandi.
Maksvell Korne
Korne o‘zi tarbiya topgan "Mes"da yangi bitim tuzmay, 2015 yilda "Lion"ga yo‘l oladi. U yangi jamoasida muhim futbolchiga aylangan. Korne "Lion" bilan 2020 yilda YECHL yarim finaliga qadar yetib boradi. 2021 yilda, yarim himoyachi "Byornli"ga, 12.9 million funt evaziga sotilgandi. Korne 2022 yilda "Vest Xem" bilan shartnoma imzolab, jamoani YEKLda chempionga aylantirdi.
Timo Verner
Vernerning "Chelsi"dagi davrida tanigan muxlislar, uni uchalik ham xushlamasligi mumkindir. Ammo nemis hujumchisi, bir paytlar Bundesliganing eng yorqin vakili edi. U 2020 yilga qadar "Leypsig" safida 4 mavsum harakat qilib, 95 ta gol uradi. Shunday sermahsulligi sabab ham Verner "Chelsi" e’tiboriga tushib, 47.5 million funt evaziga sotib olinadi. Hujumchi o‘tgan mavsum boshida yana "Leypsig"ga qaytib, 16 ta golga mualliflik qildi.
Aleksey Miranchuk
Rossiyalik hujumkor yarim himoyachi hozir "Torino" sharafini himoya qilmoqda. Uning transfer huquqi esa "Atalanta"ga tegishli. Miranchuk 2020 yilda Moskvaning "Lokomativ" klubidan 15 million yevro evaziga xarid qilingandi. 27 yoshli futbolchi o‘zining debyut bahsidayoq "Inter" darvozasiga gol kiritadi. U o‘tgan mavsumda "Torino" safida 4 ta gol va 5 ta assist qayd etdi.
Jeremi Boga
Boga "Chelsi" akademiyasidan chiqqan. U bir paytlar Messi tomonidan maqtalgan edi. Biroq, u bu ishonchni oqlamadi. Boga "Chelsi"ning asosiy tarkibida 18 daqiqa harakat qildi xolos. Ivuarlik futbolchi "Sassuolo"ga 3.5 million funt evaziga sotib yuboriladi. A seriyada vinger o‘z darajasini yuqorilarga ko‘tardi. U 2022 yilning yanvar oyida "Atalanta"ga yo‘l olgan edi.
ISMATOV J.
