"Arsenal" 2022/23 yilgi mavsumni yuqori notada o‘tkazdi. Jamoa chempionlikka erisha olmagan bo‘lsa ham, ko‘pchilik muxlislarda iliq taassurot qoldira oldi. Shu sabab, yozgi mavsumoldi o‘yinlarida ham ulardan ko‘p narsa kutilgan edi. Umuman olganda, Mikel Arteta shogirdlari o‘tkazilgan to‘rtta bahsda yaxshi harakat qildi. London klubi transferlar oynasida 3 ta futbolchi uchun 200 milliondan ko‘proq pul sarfladi. Transferlarni muvaffaqiyatli yakunlagach, klub futbolchilari bilan mavsumoldi o‘yinlari uchun Atlantika Okeani uzra AQSHga parvoz qildi. O‘tgan yili "Arsenal" birorta mavsumoldi bahsida mag‘lub bo‘lmagandi. Biroq, bu safar boshqacharoq bo‘ldi. To‘pchilar har xil natijalar qayd etdi. Quyida hozirga qadar o‘tkazilgan o‘yinlarda "Arsenal"ning qaysi futbolchilari yaqqol porlaganini bilib olasiz.
Yurriyen Timber
Timberning kelishi Deklan Rays muammosi bilan ancha kechikdi. Niderlandiya terma jamoasi a’zosi keliboq, Artetaning talablariga javob bera olishini ko‘rsata oldi va o‘yinlarda ishonchli harakat qildi. Sobiq "Ayaks" futbolchisi MLS'ning yulduzli tarkibiga qarshi o‘yinda zaxiradan tushib, o‘zini ko‘rsatdi. "MYU"ga qarshi 2-0 hisobidagi mag‘lubiyatli bahsda esa jamoaning eng yaxshi harakat qilgan vakili aynan u edi. Bulardan ko‘rindiki, Timberning potensiali Arteta jamoasida hali to‘liq namoyon bo‘lmadi. U to‘pchilarning o‘yiniga yanada keskinlik qo‘sha oladi. Timber klub evolusiyasining muhim qismiga aylana oladi. Kelayotgan mavsumda buni kuzatishimiz mumkin. Garchand "Arsenal"ning qanotlarida futbolchilar yetarlicha bo‘lsa ham, Timber bemalol har ikki tomon uchun birinchi navbatda afzal ko‘riladigan vakil bo‘ladi.
Yakub Kivior
Kivior yanvar oyida jamoaga qo‘shib olinadi. U mavsumning ikkinchi yarmida kam ko‘rinish berdi. Biroq, Salibaning yo‘qligida, Kivior himoyaga barqarorlik baxsh eta oldi. 2022/23 yilgi mavsum so‘nggida polshalikdan biz chap qanot himoyasida foydalanilganini guvohi bo‘ldik. Biroq, yaqinda o‘tkazilgan o‘rtoqlik uchrashuvlarida ma’lum bo‘ldiki, Kivior "yolg‘och qanot himoyachisi" roliga ham mos tushadi. Bunday vazifani oldin Oleksandr Zinchenko bajarardi. Kiviorni "MYU"ga qarshi ko‘rmadik. U o‘z darajasini asosan "Nyurnberg" va MLS yulduzlari bilan ko‘rsatgandi. Ha, 23 yoshli futbolchida Zinchenkodagi kabi qobiliyat bo‘lmasligi mumkindir, ammo kelajakda Arteta undan unumli foydalana oladi.
Leandro Trossard
Aytish kerakki, mavsumoldi bahslarida "Arsenal" safida yorqin ko‘ringanlar ko‘p emasdi. Ayniqsa, hujum chizig‘ida. Gabriel Jezus va Bukayo Saka o‘z standartlarida harakat qildi. Ammo aqlbovar qilmas darajaga chiqa olmadi. Muxlislar ulardan ko‘p narsa kutadi. Shu sababli, ularning oddiy o‘yinlaridan qoniqmay qo‘yganmiz. Hujumda alohida ajratib ko‘rsata oladigan figura sifatida Trossardni ayta olamiz. Belgiya terma jamoasi a’zosining asosiy ishi yarim himoyada kechganiga qaramasdan, u hujumga ijodiylik baxsh etib turdi. Arteta Granit Jakaning o‘rnini qanday yopish haqida o‘ylay boshladi va Kay Xaversni sotib oldi. U esa "MYU"ga qarshi unchalik ham yaxshi ko‘rinmadi. Trossard esa chap qanot markazni yaxshi ushlay oldi. Hujum tashkil qilish va bog‘lamlar o‘rtasida o‘ynashda uning harakatlari yaqqol ajralib turgandi. "Barselona"ga qarshi bahsda esa Trossard, o‘zining o‘rnini egalladi. Chap qanot hujum u uchun o‘ta qulay ekani ma’lum bo‘ldi. Dubl qayd etgan futbolchi, o‘zining mahoratini yana bir bor namoyish etdi. Uning har ikki goli Kataloniyaliklar darvozasiga individual mahorati sababli kiritildi. "Arsenal"ning YECHLga qaytadigan mavsumida Leodan yanada ko‘prog‘ini kutib qolamiz.
ISMATOV J.
