Italiyalik tajribali himoyachi Leonardo Bonuchchi yozda Turinning "Yuventus" klubini tark etishi mumkin. Telegraaf nashri xabariga ko‘ra, 36 yoshli italiyalik futbolchiga Amsterdamning "Ayaks" klubi qiziqish bildirmoqda.

Bonuchchi klubini o‘zgartirish haqida o‘ylamoqda, chunki "keksa sinyora" rahbariyati uni o‘z rejalariga kiritmayapti. "Yuventus" himoyachiga tezda yangi jamoa topishga yordam berish uchun u bilan tuzilgan shartnomani muddatidan oldin bekor qilishga tayyor.

2022/2023 yilgi mavsumda Leonardo barcha musobaqalarda 26 ta o‘yinda maydonga tushib, ikkita gol urgan. Tomonlar o‘rtasidagi amaldagi shartnoma 2024 yilning yozida yakuniga yetadi.