«Real» bosh murabbiyi Karlo Anchelotti AQSH bo‘ylab mavsumoldi turnesi oldidan «Madrid Sport Siti»da amerikalik jurnalistlar uchun tashkil etilgan masofaviy matbuot anjumanida qatnashib, turli savollarga javob berdi.
Aytish joiz, «Qirollik klubi» okean ortida Soccer Champions Tour turniridan o‘rin olgan 4ta o‘yinda maydonga tushadi. Italiyalik murabbiy videomuloqotni safarga bog‘liq umumiy fikrlari bilan boshladi: «Ushbu turnening bir qator muhim tomonlari bor: jamoani yangi mavsumga tayyorlash, ajoyib stadionlar bilan tanishish, Qo‘shma Shtatlardagi muxlislar bilan birga bo‘lish... Tabiiyki, ularda kuchli taassurot uyg‘otishni istaymiz, demak, «Real» o‘z o‘yinini ko‘rish uchun stadionlarga tashrif buyuradigan muxlislarga imkon qadar tomoshabop futbol namoyish etishga urinadi. Umuman, AQSH safari hozirgi bosqichda o‘ta muhim, binobarin, tarkibimizda bir qator yangi yigitlar bor va ularni o‘z uslubimiz, falsafamizga tezroq moslashtirishimiz zarur. Qolaversa, bunga qadar ma’lum muddat yakka tartibda ishlagan milliy jamoalar vakillari ham safimizga qaytishadi. Hozirda qattiq ishlayapmiz va o‘yin maromi nuqtai nazaridan shunday turnelar juda zarur. Ayniqsa, Bellingem, Gyuler, Braim, Fran Garsiya va Xoselu kabi futbolchilar uchun. Zero, ular yangi muhitga tezroq moslashishlari va jamoadoshlari bilan yaqinroq tanishib olishlari kerak».
- «Real» turnesi Los-Anjelesdan boshlanadi, nima uchun?
- Bu shahardagi Kaliforniya universitetida ajoyib sharoitlar yaratilgan, qolaversa, ob-havo ham yaxshi. Bilishimcha, issiq darajasi me’yorida. Umuman, Qo‘shma Shtatlarda go‘zal stadionlar va qoyilmaqom muxlislar borligiga aminman.
- AQSH futboli haqida nima deya olasiz?
- Futbol AQSHda hali o‘ta mashhur sport turlari bilan raqobatlashishi kerak. O‘ylaymanki, Messining «Inter Mayami» safiga qo‘shilgani millionlar o‘yinining umumiy obro‘sini ancha oshiradi. Deylik, endilikda jamoatchilik futbolga kuchli ishtiyoq bilan qarasa kerak. To‘g‘ri, «Rouz Boul»ga bog‘liq xotiralarim yaxshi emas, chunki JCH-94 finalida Braziliya termasiga ayni shu stadionda yutqazgandik. Lekin ishonchim komil, «Milan»ga qarshi o‘yinimizda «Rouz Boul» manzarasi butkul boshqacha bo‘ladi.
- Mavsumoldi «El-klasiko»ga qanday qarayapsiz?
- «El-klasiko» qachon, qayerda va qanday maqomda bo‘lishidan qat’iy nazar, klassikaligicha qoladi. Oddiy aytganda, «Real» va «Barselona» o‘rtasidagi o‘yinlarga nisbatan «o‘rtoqlik» sifatini ishlatish to‘g‘ri emas. Bizni oldinda yana bir fantastik qarama-qarshilik kutayotgani tayin. O‘ylaymanki, Kataloniyada ham o‘yinga shunday qarashadi. Chunki hamisha shunday bo‘lgan, axir o‘rtada katta raqobat bor va har qanday o‘zaro o‘yin alohida ahamiyat kasb etishi muqarrar. O‘tgan yili barchasini sehrli muhitda ko‘rgandik va ishonchim komil, bu safar Dallas ham bizni betakror manzara bilan siylaydi. Tabiiyki, murakkab qarama-qarshilik, asosiysi, barcha yigitlar unda ishtirok etishdan o‘zgacha yayrashadi. Ha, norasmiy «El-klasiko», shunga qaramay, unda g‘alaba qozonish yo‘lida borimizni beramiz. Takrorlayman, «Real» va «Barselona» o‘rtasida hech qachon o‘rtoqlik o‘yini bo‘lmaydi.
- Bellingem ham turnega shaymi?
- U juda yosh va dinamikasi bo‘yicha ixtiyorimizdagi boshqa yarim himoyachilardan keskin farqlanadi. Judning «Real»ni tanlagani va biz bilan birga ekanligidan bag‘oyat xursandmiz. O‘ylaymanki, u «Real» darajasini yanada oshirishga qodir yigit. Mana, hozir qattiq ishlamoqda, yaxshi shug‘ullanmoqda va turneda ham o‘zini ko‘rsatsa kerak.
- Kamavinga endi chap qanot himoyachisi sifatida o‘ynaydimi?
- U Mendi jarohati tufayli himoyachi rolini ham bajargan. Hozir esa Mendi o‘zini yaxshi his qilmoqda, shuningdek, endi bu chiziqda jamoa o‘yiniga katta hissa qo‘shish salohiyatiga ega Fran Garsiya ham bor. Kamavinga - yuqori sifat va qobiliyatga ega yarim himoyachi. Qisqasi, undan himoyachi emas, balki markaz vakili yoki pleymeyker rolida foydalanishni istayman. Oddiy ifoda etganda, agar Mendi va Fran Garsiyada qandaydir muammo sezilmasa, Eduarni himoyaga qo‘ymayman.
- O‘zi sizda muayyan tizim bormi yoki sxemani mavjud tarkib va futbolchilarga moslashtirishni ma’qul ko‘rasiz?
- Murabbiylik faoliyatini boshlaganimda, chizma bo‘yicha aniq fikrim bor edi va boshida futbolchilarga moslashishni istamadim. Deylik, «Parma»da Badjo pleymeyker rolida o‘ynashni xohladi, ammo jamoa tizimini o‘zgartirishni o‘ylamadim ham. Aytish mumkinki, shu xato ortidan tajriba to‘pladim. Keyin «Yuventus»da o‘yin chizmasini Zidan va boshqa yigitlarga moslashtirish yaxshiroq ekanligini tushuna boshladim. Qisqasi, o‘yin tizimida murabbiy emas, avvalo, futbolchilar o‘zlarini qulay his etishlari kerak. Shu tariqa jarayonga moslashishni o‘rgandim va shu-shu tarkibga qarab ish tutyapman. Shu ma’noda aytsam, bu yil ehtimol, boshqacha tizimda o‘ynarmiz... To‘g‘ri, avvalgi chizmamiz katta muvaffaqiyat keltirganini ham unutmasligimiz kerak, lekin xohlaymizmi-yo‘q, yangi uslublarni sinab ko‘rishimiz shart, baribir. Barchasini avvalo, AQSH turnesida ko‘ramiz, hozir taktikalar ustida ishlashning ayni vaqti...
M.PO‘LATOV tayyorladi
