"Arsenal"ning 2021 yilning yozida APLni tark etgan "Sheffild Yunayted"dan Aron Ramzdeylni sotib olish qarori kulgili tuyulgandi. Ko‘pchilik, o‘shanda rahbariyatni 30 million funtni ko‘kka sovurishda ayblaydi. Biroq, Ramzdeyl xeyterlarning ovozini o‘sha mavsumdagi o‘yinlari bilan o‘chirib qo‘ya oldi. Oradan ikki yil o‘tib, "Arsenal"ga yana yangi darvozabon kerak bo‘lib qoldi. Mikel Arteta 40 million funt evaziga "Brentford"dan David Rayyani xarid qilmoqchi. Xo‘sh, nega bunday yo‘l tutilmoqda? O‘zi "Arsenal"ga yangi posbonning nima keragi bor?
2021/22 yilgi mavsumni Ramzdeyl qanday o‘tkazgandi?
Darvozabon "Arsenal"ga kelib, katta bosim ostida qoladi. U London klubiga kelishidan oldin ikki mavsum ketma-ket APLdan tushib ketgan jamoalarda harakat qilgandi. Shunga qaramay, unga bildirilgan ishonch oqlandi. Ramzdeyl mavsumni 73.4 foizlik seyv ko‘rsatkichi bilan yakunladi. U APLning eng yaxshi uchta darvozabonidan biriga aylandi.
2022/23 yilgi mavsumda Ramzdeyl o‘sishga erishdimi?
Bu savolga javob oddiy – HA! Garchand quruq o‘yinlar borasida Ramzdeyl yaxshi darajaga ega bo‘lsa ham, seyv borasida Ramzdeylni zo‘r deb bo‘lmasdi. Angliya terma jamoasi a’zosi 70.6 foiz natija qayd etdi. Bu esa APLdagi 11 o‘rin va o‘rtacha ko‘rsatkich sanaladi. Unga raqobatchi bo‘lishi kutilayotgan Rayyada esa 77.7 foizga tengdir.
Nega Arteta ikkita bir xil darajadagi darvozabon istamoqda?
Bu savolga ham aniq javob tayyor – Arteta maydondagi daqiqalar uchun futbolchilarni raqobatga undashni istaydi. Buni butun jamoa misolida ko‘rishimiz mumkin. Masalan, Yurriyen Timber Ben Uaytga raqobat uchun olib kelindi. Vaholanki, Uayt o‘tgan mavsum biror joyda qo‘pol xatoga yo‘l qo‘ymagandi. Leandro Trossard yanvarda Martinelli bilan kurashish uchun sotib olindi. Braziliyalik vinger o‘tgan mavsumni qanday darajada o‘tkazganganini esa bilasiz. Kay Xaversning kelishi birato‘la uchta pozisiya egalari – Saka, Edegor va Jezus uchun ogohlik qo‘ng‘irog‘i deyish mumkin. Shunday ekan, nima uchun Ramzdeylga raqobatchi olib kelinmasligi kerak? Ha, tarkibda Mett Tyorner bor. Ammo u tengma-teng darajada kurasha olmasligi ma’lum bo‘lgan.
"Arsenal" Ramzdeyldan kechmoqchimi?
Rayyaning kelishi, aslida, Ramzdeyl variantidan chekinishni anglatmaydi. Bu ingliz posbonini o‘z sport formasini yuqori cho‘qqiga olib chiqishga undaydigan omillardan biri bo‘ladi. Hammasi raqobat va o‘sish uchun qilinmoqda. Arteta Ramzdeylni Bernd Lenoga raqobat uyishtirish uchun olib kelgandi. Nemis futbolchisi o‘z darajasini yo‘qotgani sababli, Ramzdeyl uni ortda qoldirdi. Har qaysi pozisiyaga yangi futbolchi olib kelish bilan bosh murabbiy futbolchilarga yangi mujda yo‘llamoqda – maydonda faqat munosiblargina to‘p tepadi. Hech kimga, bunda ortiqcha imtiyoz taqdim etilmaydi. Albatta, adolat yuzasidan aytish kerakki, Ramzdeyl hali zaxiraga o‘tirib qoladigan darajadagi yirik xatoga yo‘l qo‘ymadi. Shu sabab uning asosiy tarkibdagi o‘rni saqlanadi. Biroq, Rayya undan o‘zib keta olsa, Arteta o‘zgarish qilishdan cho‘chimaydi.
David Rayya nimasi bilan ajralib turadi?
Rayya Ramdeylda bo‘lgan hamma sifatlarga egalik qiladi. Ispaniya terma jamoasi a’zosining seyv ko‘rsatkichlarini aytgandik. Shuningdek, Rayya oyoq bilan yaxshi harakat qiladi. Bu esa top-klublar uchun eng muhim omillardan biridir. Aslida "Arsenal" 2021 yildayoq Rayyaga taklif bilan chiqqandi. Ammo, o‘shanda "Brentford" qo‘ygan narxini pasaytirishdan bosh tortgan va "Arsenal" Ramzdeylni sotib olishga qaror qilgan. Rayyaning xaridida "Arsenal" darvozabonlar murabbiyi Inaki Sananing o‘rni katta bo‘lishi aytilmoqda.
"Arsenal"ning Rayya borasidagi qarori qat’iymi?
Rayya xaridi faqat jamoa foydasiga xizmat qilgan bo‘lardi. Darvozabonning o‘zi ham raqobat bor jamoaga o‘tishni niyat qilgan. U kurashni istamoqda. "Arsenal"ga esa shunday mentalitetga ega futbolchilar juda ham zarur. Ushbu transferdagi eng katta muammo har doimgidek pul masalasi. Bundan ikki yil ilgari "Arsenal" ispan futbolchisi uchun 30 million funt taklif etgan. Hozir esa 27 yoshli posbon evaziga 40 million funt so‘ralmoqda. "Brentford" Rayyaning narxini tushirishi niyatida emas. Ispaniya terma jamoasi a’zosi uchun "Bavariya" va "Tottenxem" ham qiziqish bildirgandi. Ammo aynan narx masalasi ularni o‘ylantirib qo‘ygan. "Arsenal" esa narxni tushirishga harakat qiladi. Bu borada voqealar rivojini kuzatishda davom etamiz.
ISMATOV J.
