Jessik Ngankam - quyi Bundesligaga tushib ketgan «Gerta»ning yetakchi futbolchilaridan biri.
Bu hujumchi oldida yangi mavsum CHLda qatnashadigan jamoa safiga qo‘shilish imkoniyati yuzaga kelgandi. Biroq u shunday ajoyib variantdan voz kechdi. Nega, sababi nima? Gap shundaki, Ngankam «Gerta»ning azaliy raqibi «Union»dan taklif oldi. Bu ikki jamoa o‘rtasidagi raqobat ayniqsa, Berlin ichida mislsiz darajaga ko‘tarilganini hisobga olsak, Jessik qarorining ma’nosi o‘z-o‘zidan yuzaga qalqib chiqadi.
Ha, Jessik Ngankam «Gerta»ning birinchi raqamli dushmani sanalgan «Union» libosida maydonga tushishni o‘ziga ep ko‘rmadi. Uning bu boradagi nuqtai-nazariga e’tibor qarating: «Union»ning xizmatimga jiddiy qiziqayotganini ancha oldin bilganman, lekin e’tibor qaratmagandim. Shaxsiy agentim klub transferimni to‘liq xarid qilishga moyilligini aytganida, chamasi 3-4 daqiqa o‘ylanib qoldim: «Hammasiga nuqta qo‘yadigan qaror qabul qilish vaqti keldi». Keyin «Union» libosida o‘ynamasligim, chunki «Gerta»ni chin yurakdan yaxshi ko‘rishimni aytdim. To‘g‘ri, tan olaman, shuncha yillik faoliyatimda ilk marta CHLda ishtirok etadigan jamoa e’tiboriga tushganimdan ko‘nglim tog‘dek ko‘tarildi». Aytish joiz, Ngankamning «Gerta»da qolishi ehtimoli juda past. Asosiysi, u «Union»ga o‘tmaydi!
Germaniyaga Kamerundan ko‘chib kelgan muhojirlar oilasida tug‘ilgan Jessik aynan «Gerta» tarbiyalanuvchisidir. U Berlin klubi tizimiga 2006 yili, 6 yoshida qo‘shilgan. Asosiy jamoa safidagi debyutini esa 2020 yilning oxirida nishonladi. Jessik shundan buyon «keksa xonim» sharafini 37ta o‘yinda himoya qilib, 6ta gol va 3ta samarali uzatma qayd etdi. To‘g‘ri, orada, ya’ni 2021/2022 yillar mavsumida «Groyter Fyurt»ga ijara kelishuvi asosida yo‘l olib, bu jamoaning 6ta uchrashuvida qatnashdi, o‘z hisobiga 2ta gol va 1ta assist rasmiylashtirdi.
Darvoqe, Jessik yaqinda Germaniya terma jamoasi tarkibida yoshlar o‘rtasidagi Yevropa chempionatida maydonga tushdi. Faqat nemislar turnirda muvaffaqiyatsizlikka uchrashdi - Angliya, Isroil va Chexiya termalari joy olgan guruhda so‘nggi pog‘onani band etishdi. Ngankam esa xuddi «Borussiya» D. yulduzchasi Yusuf Mukoko kabi isroilliklarga qarshi kechgan bahsda penaltidan foydalanolmadi va turli haqoratlar ummoniga g‘arq bo‘ldi.
Tarixga qarasak, «Gerta» va «Union» o‘rtasida transferlar kamdan-kam kuzatiladi. Ma’lumotlarga ko‘ra, 1989/1990 yillar mavsumidan buyon Berlinning ikki jamoasi atigi 39 marta o‘zaro «oldi-sotdi»ni amalga oshirgan. Biroq deyarli barcha transferlar o‘smirlar yoki yoshlar toifasida. Buni tushunish qiyin emas - o‘smirlik davri shaharning bitta jamoasidan ikkinchisiga o‘tishda vahimali joyi yo‘q. Xullas, azaliy raqiblar kattalar miqyosida atigi 4ta transferni rasmiylashtirishgan. Jumladan, yarim himoyachi Yulius Kadening 2019 yili «Gerta»dan «Union»ga o‘tgani hozircha oxirgi o‘zaro kelishuv bo‘lib qolmoqda.
MUHAMMADSODIQ tayyorladi
