“Andijon”ning chernogoriyalik legioneri Armin Boshnyak yangi jamoasidagi ikkinchi o‘yinida debyut golini urishga muvaffaq bo‘ldi.

U “Bunyodkor”ga qarshi uchrashuvda chiroyli gol muallifiga aylandi, tezkor gol ko‘rdik. Biroq g‘alaba mezbonlarga nasib qildi va “Andijon” alamli tarzda imkoniyatni boy berdi.

Boshyank esa bir qator savollarga javob qaytardi.

— Armin, debyut golingiz chiroyli chiqdi. Siz buni qanday ta’riflagan bo‘lardingiz?
— Ha, mening debyut golim juda ham ajoyib bo‘ldi. Lekin pozitiv natijaga erisha olmaganimizdan to‘g‘risi afsusdaman.

— Ha, “Andijon” yakunda mag‘lub bo‘ldi. Sizningcha, buning sababi nimada?
— Bu o‘yinda bizga biroz omad yetishmadi. Vaholanki, yaxshi ishladik va qattiq mehnat qildik. Shunga yarasha yaxshi o‘ynadik. Ammo ta’kidlaganimdek, biroz omad yetishmadi.

— Armin, o‘shanda zarba berayotganingizda gol bo‘lishini aniq his qildingizmi yoki tavakkal tepdingizmi?
— Zarba berayotgan chog‘imda to‘p darvozaga kirishini sezib turdim. Ayniqsa, to‘pning yo‘nalishi start olishidanoq sezdim. Lekin jamoadoshlarimga rahmat aytishim kerak. Chunki ular o‘sha vaziyatda menga to‘pni qulay tarzda oshirib berishdi.

— Faoliyatingiz davomida urilgan chiroyli gollar ichida “Bunyodkor”ga qarshi uchrashuvda kiritgan golingiz nechanchi o‘rinda?
— Albatta, bu mening faoliyatimdagi eng sevimli gollarimdan biri bo‘ldi. Chunki bu O‘zbekiston chempionatidagi ilk o‘yinlarimda sodir bo‘ldi va ashaddiy muxlislarimiz qarshisida yuz berdi, bu ajoyib edi. Aytishim mumkinki, yangi klubga qo‘shilgach, bunday debyut golni urish yoqimli. Afsuski, natija ko‘ngildagidek chiqmadi.

— Aslini olganda, taassurotlaringiz qanday? Raqib siz o‘ylaganchalik kuchli ekanmi yoki...
— Bizda juda yaxshi jamoa bor deb o‘ylayman. Fikrimcha, ligadagi istalgan jamoaga qarshi tengma-teng o‘ynab ularni mag‘lubiyatga uchratishga imkoniyatimiz bor. Buguncha bizga omad yetishmadi. Ammo kelgusi uchrashuvlarda g‘alaba qozonishimizga ishonaman.

— Endi bu o‘yinni unutib keyingi bellashuvga tayyorgarlik ko‘rish lozim, shunday emasmi?
— Albatta, “Bunyodkor”ga qarshi o‘yinni unutish kerak va keyingi uchrashuvlarga tayyorgarlik ko‘rib, bizni kutayotgan bellashuvda g‘alaba qozonishimiz kerak.

“Andijon” matbuot xizmati.